Rrëmujë në Qendrën e Vaksinimit, Zemaj: Neglizhencë! Janë fshehur dhe vdekjet nga COVID-19

Neglizhencë e tepruar, e skajshme si në aspektin fizik ashtu dhe human e konsideron rrëmujën e cila u shkaktua sot në qendrën e vaksinimit “1 Maji” në Prishtinë, Ish-Ministri i Shëndetësisë, Armend Zemaj, ndërsa shtoi se ka informacione që hedhin dyshime në fshehjen e numrit të vdekurve dhe infektuarve me COVID-19.

“Kam marrë disa informacione që janë shqetësuese të cilat hedhin dyshime edhe në fshehjen e numrit të vdekjeve dhe të infektuarve. Kjo është skandaloze, nëse evidentohet si e tillë. Kam kërkuar që këto informacione zyrtare të përcillen përmes shtabeve emergjente. Sot kam komunikuar me disa zyrtarë të komunave dhe familjarët e tyre kanë adresuar që X personi ka qenë i infektuar me COVID-19 dhe ka rezultuar si i vdekur dhe nuk është i pasqyruar në statistikat e dhëna.

Këtë po e përmendi sepse Kosova gjatë gjithë kësaj kohe në menaxhimin e vështirë që e kemi pasë, kemi qenë 2 3 adresime të suksesit që i kemi pasë dhe që na kanë bërë të dallojmë prej vendeve tjera,” është shprehur Armend Zemaj ndërsa për rrëmujën e krijuar sot tek qendra “1 Tetori” tha se nuk do të kishte ndodhur nëse nuk do të ishte injoruar situata.

“Kjo është një neglizhencë e tepruar, e skajshme edhe në aspektin fizik por edhe në aspektin human. Është treguar që nuk është në fokus menaxhimi i pandemisë dhe ardhja dhe përcjellja e vaksinave ka ngritur më shumë dilema në ruajtjen e shëndetit, sesa në rritjen e efikasitetit të vaksinimit. Kjo është vetëm faza e parë, pasi është doza e parë që e marrin qoftë personeli shëndetësor ose qytetarët sipas kategorisë së moshave”.

Armend Zemaj është i bindur se me mbikëqyrje dhe një plan imunizimi skenat që u panë sot nuk do të ndodhnin:

“Nëse do kishte mbikëqyrje strikte dhe do të ishte bërë përgatitja sipas planit të imunizimit, atëherë nuk do të ndodhnin këto skena. Nuk janë marrë me përgatitjen dhe shtrirjen e shpërndarjes së vaksinimit. Kjo është esenca e mospërfilljes as të protokollit për vaksinim dhe as të planit të imunizimit. Kjo nuk do të ndodhte fare edhe në objektin e sallës “1 Tetori” po të kishte vigjilencë dhe seriozitet në trajtimin edhe hapësirave që ofron salla, atëherë nuk do të ndodhte ky grumbullim”, u shpreh ai.