Rrëmujëhane, Meta: Refuzimi i 13 Tetorit, thellon krizën!

Presidenti i Republikës, Ilir Meta edhe sot nga Xhafzotaj foli për 13 Tetorin, i cili sipas tij duhet të njihet, ndryshe kriza do të thellohet ndërsa situatën e krijuar pas vendimit të djeshëm të Gjykatës së Durrësit që bëri nul zgjedhjet e 30 Qershorit e quajti rrëmujëhane.

“Rama ndoshta e ka datë tersi 13 tetorin, por ne e shtymë provimin e qershorit për në tetor. Nëse edhe në tetor nuk do gjejmë zgjidhje për krizën, mund të ndodhë përshkallëzim akoma dhe më i madh,” tha Presidenti i Republikës ndërsa për vendimin e Gjykatës së Durrësit e cila refuzoi t’i japë mandatin Valbona Sakos për të drejtuar Bashkinë e Durrësit ai tha:

“Çdo proces gjyqësor që vazhdon të zhvillohet është demonstrim i rrëmujehanës që zhvillohet. Mungesë e respektit për Kushtetutën, keqzbatimi i qëllimshëm dhe i njëanshëm i ndryshimeve kushtetuese që u realizuan tri vete më parë. Me një qarkore u shpall inegzistent dekreti i Presidenti dhe u mblodh organizata socialiste në KQZ dhe u bë presion ndaj Kolegjit Zgjedhor, dhe u bë rrëzimi i kërkesës së zotit, Idajet si rrëzimi i dekretit të Presidentit.

Por siguroj shqiptarët që nuk ka patur zgjedhje të qytetareve, as zgjedhje kushtetuese në 30 qershor. Çdo ndërkombëtar që thotë që gomari fluturon,  kjo mund të ndodhë në art dhe pikturë, por në Shqipëri e dimë që gomari nuk fluturon. Nuk është shqiponjë,” tha Meta ndërsa komentoi edhe Komisionin Hetimor parlamentar të ngritur nga maxhoranca për shkarkimin e tij:

“S’kam asnjë shqetësim për asnjë komision hetimor, asnjë gjykatë, në Shqipëri apo në çdo institucion tjetër që ka juridiksion në Shqipëri. I vetmi shqetësim i imi është data 19 tetor. Çfarë do u themi shqiptarëve? Çfarë do u themi që e kishte fajin Edi apo fajin Luli dhe Mona. Çfarë do u themi që na gënjyen disa europian apo kështu na thënë disa amerikanë.”

Meta me këtë rast rikutojoi Edi Ramën dhe jo vetëm:

“Para 20 vjetësh Shqipëria ishte para Kroacisë. Ku është Kroacia sot? Ku është Shqipëria? Shqiptarët po ikin sikur të ishte viti ’90. Kush do mbajë përgjegjësi?! Jam shumë fleksibël për të ndryshuar datën 13 tetor, me që është perceptuar si ditë tersi. Por nuk kam në dorë të ndryshoj dot 18 tetorin. Kemi fut mik të fortë për të shtyrë provimin në vjeshtë, por s’çelen negociatat me qoka ndërkombëtarë.”