Rrezik për botën, Pompeo: Regjimi iranian i pajisur me armë bërthamore!

Pas paralajmërimit të Zëdhënësit të qeverisë iraniane, Ali Rabiei, se sot Teherani do të kalojë në nivelet e lejuara të pasurimit të përcaktuara në marrëveshjen e arritur me Shtetet e Bashkuara, Rusinë, Kinën dhe vendet evropiane, katër vjet më parë, RFE raporton se SHBA sërish ka paralajmëruar Iranin, të mos vazhdojë me programin e tij bërthamor.

Regjimi i Iranit, i armatosur me armë bërthamore, për Sekretarin amerikan të Shtetit, Mike Pompeo, përbën një rrezik edhe më të madh për botën.

“Zgjerimi i fundit i programit të tij bërthamor nga ana e Iranit, do të çojë në izolim dhe sanksione të mëtejshme. Regjimi i Iranit, i armatosur me armë bërthamore, do të përbënte një rrezik edhe më të madh për botën ” tha Sekretari amerikan i Shtetit, Mike Pompeo, përmes rrjetit social Twitter.

Ministri i Mbrojtjes i Iranit, Amir Hatami, tha se ndalimi i një cisterne iraniane nga Britania, javën e kaluar, ishte një veprim kërcënues dhe i gabuar. Hatami këtë deklaratë e bëri sot në një fjalim të transmetuar drejtpërdrejt në televizionin shtetëror ku gjithashtu theksoi se rrëzimi i një droni amerikan muajin e kaluar, dërgoi një mesazh se Teherani do të mbrojë kufijtëpse.

Më 4 korrik, marinsat britanikë e konfiskuan cisternën e cila dërgonte naftë në Siri, në kundërshtim me sanksionet e Bashkimit Europian, një veprim që shkaktoi zemërimin e Teheranit dhe mund të përshkallëzoj konfrontimin e tij me Perëndimin.

Cisterna u konfiskua në Gjibraltar, pasi autoritetet e atjeshme kishin kërkuar ndihmën e ushtrisë britanike.

Ndërsa rrëzimi i dronit amerikan rriti tensionet SHBA-Iran.

Zyrtarët iranianë kanë thënë se avioni ishte në hapësirën ajrore të tyre ndërsa Uashingtoni ka thënë se avioni po fluturonte mbi ujërat ndërkombëtare.

Ndërkohë, Shtetet e Bashkuara kanë thënë se Irani do të përballet me më shumë sanksione për rritjen e programit të tij bërthamor përtej kufijve të një marrëveshjeje historike të vitit 2015, që Uashingtoni nuk e mbështet më.