Rrezik, Republika e Prokurorëve apo e Kryeministrit
nga Agim Popoci
Pesë vjet më parë shqiptarët e lemerisur nga lufta që bënte me ushtri kundër covidit, Edi Rama, me kërshëri shikonin leksionet e tij që transmetoheshin në rrjetet sociale, se si duhet pastruar duart!
Por, kot e kishte, as nuk i mësoi shqiptarët se si lahen duart dhe as nuk arriti ta pastroj pisllëkun e mbledhur që kishte në duart e tij që nga viti 1999 kur u ul në fronin e kryetarit të Bashkisë Tiranë!
Sot, në të njëjtin kanal të shfrenuar, me një armik shumë më të egër se covidi, Edi Rama sërish del duke zgurdulluar sytë për ti bindur shqiptarët se sa të pastra i ka duart, dhe, se sa në rrezik është Shqipëria nga SPAK-u, që ka marrë sapunin dhe po tenton ti pastroj doçkat kriminale të Belinda Ballukut!
Kujdes! Ti pastroj, jo ti prangos, ndryshe Edi Rama nuk do të kishte kohë për rrjete sociale dhe leksione për Gjykatën Kushtetuese me citime nga Komisioni i Venecias, për treguar se si nuk funksionon dot ky shtet pa mbesën e Beqirit të Partisë, dhe nëse është për ta shkarkuar e shkarkon ai dhe vetëm ai, i pari i këtij vendi, i biri i Kristaqit!
I gjithë ky zor që ka Edi Rama u konsiderua nga mediat që ka nën kontroll, si rrezik nga Republika e Prokurorëve, nga po këta prokurorë të SPAK-ut që lejuan për 9 vjet kultivimin dhe trafikimin e drogës në çdo cep të Shqipërisë, madje edhe në vitin e masakrimit të covidit kur Kryeministri po lante duart, nga po këta prokurorë që kur filloi të gëlonte vjedhja e parave publike nga Qeveria Rama me inceneratorët, shqiptarët dëgjuan, jo nga SPAK-u, por nga Zv.Kryeministri Arben Ahmetaj i cili u u shpall në kërkim pasi kishte ikur jashtë shtetit, se kush ishte pronari faktik i inceneratorëve!
Dhe, jo vetëm kaq! Shqiptarët e tronditur nga qindra miliona eurot e vjedhura nga kjo Qeveri, deri në këtë rast nuk e kishin kuptuar reformën në drejtësi, por tani kur SPAK pagëzoi këtë vjedhje të Qeverisë Rama si “vjedhje intelektuale” ndërsa filloi arrestimi i liderëve të opozitës dhe çdo gjëje që frymonte opozitarizëm, kontrolluar nga vetëm një njeri, gjithçka ishte e qartë, Republika u bë e Kryeministrit!
Po, në këtë Republikë të Kryeministrit u arrestuan edhe ca nga ministrat e Edi Ramës që u detyruan të japin dorëheqje për qindra miliona të vjedhur, ashtu si dhe ca drejtorë bashkie dhe vetë Lali Eri, por, ndryshe nga rastet tjera, po ky SPAK nuk sekuestroi asnjërën nga pasuritë e këtyre hajdutëve intelektualë!
Edhe në këto rrethana favorizuese për vjedhje qeveritare, ca idealistë komunistë filluan të kenë dyshime me këtë pushtetin e SPAK-ut ndërsa Kryeministri deklaronte se përgjegjësia është individuale, por, kur dyshimet u shndërruan në bindje se Republika nuk është e Edi Ramës, i pari i qeverisë u detyrua të reagoi për të shpëtuar jo vetëm drejtuesin faktik të kësaj Republike por edhe atë që ai e quante krijesë personale, SPAK-un!
Rast ideal ishin zgjedhjet e 11 Majit, dhe shpikësi i manipulimeve elektorale shqiptare duke sqaruar fshatçe la një pusullë në letrën e pistë mbi tavolinën ku kishin kullotë komunistët ose më saktë rezultatin që do të dal nga këto zgjedhje, i cili u jetësua në epilogun përfundimtar!
OSBE/ODIHR guxoi foli për të gjitha manipulimet shtetërore të këtyre zgjedhjeve, por, jo edhe SPAK-u që sot akuzohet nga Edi Rama, sepse edhe dy shkelje zgjedhore që hetoi ishin akuza kundër opozitës!
Pra, ky është SPAK-u i rrezikshëm, që kur Qeveri Rama vjedhë qindra miliona euro heton opozitën që humbi zgjedhjet për blerje vote!
Por, në perfeksionin e vetë për të shkel në fyt opozitën, Edi Rama bëri një lëshim që përgënjeshtroi pretendimet mediatike që po pompoheshin me shumë zell si për Republikën e Prokurorëve ashte dhe Republikën e Kryeministrit, Arben Ahmetajn!
Zv/Kryeministrin e tij tashmë në kërkim e akuzoi ai edhe SPAK-u për shumë gjëra, krijuan opinionin ndër komunistët e tyre se ai është hajdut, i shkelën jo në kallo por në familje, por, gojën nuk janë mbyllën dot!
Si dëshmitar okular i shumë gjërave, që SPAK nuk i ka prekur dhe nuk po i prek dot, Arben Ahmetaj foli ndër të tjera edhe për vjedhjen e 50 milionë eurove në Tunelin e Llogarasë!
Pas shumë insinuatave dhe asnjë rruge të pashembur që ndërtoi ministria e drejtuar nga Belinda Balluku, mbesa e Beqirit u mor e pandehur për Tunelin e Llogarasë dhe u pezullua nga detyra e Zv/Kryeministres dhe Ministres Transportit dhe Energjisë, me arsyetimin që të mos ketë ndërhyrje në hetim!
Gjithë këtë dramë, manipuluesi i opinionit publik, Edvin Krista Rama, e zhvendosi në rrjetet sociale, aty ku i kishte bërë lavazhin duarve, dhe e bëri të parëndësishëm faktin e vjedhjes së 50 milionë eurove, sepse, sipas tij, shteti është në rrezik!
Përveç sulmit ndaj Gjykatës Kushtetuese ndonëse e kontrollon pa diskutim, u kujdes dhe për pjesën tjetër që pret arrestimin e Belinda Ballukut dhe ishte skeptik në SPAK-un, si dhe atyre që presin ditë më të mira të këtij shteti pa Edi Ramën, duke pretenduar se si kjo nismë ligjore nuk ka askund në botë ndërsa paralajmëroi dhe rrezikun e krijimit të Republikës së Prokurorëve!
Ky injektim propagandastik në media nxiti dhe imagjinatën e atyre që filluan të besojnë se kemi përpara një hetim të Prokurorisë së Posaçme ngjashëm me atë italian “Mani Pulite” /lexo shqip: Duart e Pastra/, ndonëse mungon një element domethënës që e bënë të pamundur realizimin e një aksioni të ngjashëm, jo vetëm pse nuk ka arsye të marrë nën hetim 5.000 persona edhe pse vjedhja është shumë më e madhe, mungon një prokuror si Antonio di Pietro!
Shteti shqiptarë ka prodhuar shumë dijetar e horra të përmasave botërore, ka prodhuar dhe Mbret, por në historinë e këtij shteti kurrë nuk u bë asnjë Prokuror ose Gjyqtarë që mund të zë vend në histori qoftë dhe me një proces gjyqësor, vetëm horr pas horri, spiun pas spiuni, shërbëtor pas shërbëtori të pushtetit, dhe, së fundi, dhe asqer të krimit të organizuar dhe korrupsionit!
Kjo është dhe arsye që ndër shqiptarë nuk ka jo vetëm Antonio Di Pietro por as Mario Chiesa që si hajdut i pushtetit socialist do të pranonte të bëhej dëshmitar i penduar, edhe pse mund ta ketë Kryeministrin me duar më të pastra por jo më pak hajdut se homologu i tij italian, Bettino Craxi!
Gjithashtu, kjo është dhe arsyeja pse Edi Rama del e llapë gjithë ditën në rrjete sociale duke akuzuar të gjithë ata që i dalin përpara deri tek Gjykata Kushtetuese që e krijoi vetë, duke u hakërryer se si ky rast nuk ka tjetër në botë, sepse, një liderë të tillë nuk ka të dytë në botë!
Gjithçka mund të gjejë Edi Rama nga Venecia në Kuç, jo vetëm një paragraf për të mbrojtur Belinda Ballukun, por nuk mund të gjejë një kryetar bashkie me sëpatë në dorë që zhvendos shtylla elektrike pa respektuar ligjin, dhe, përveç se drejtësia nuk guxon të merret me të, qytetarët e zgjidhin sërish këtë shkelës në krye të bashkisë!
Nuk ka në botë, që prishjen e një hoteli pa le je të një miku ta ketë mbrojtur një kryetar bashkie me Polici Bashkiake, dhe sërish të rizgjedhet kryetar bashkie!
Dhe, nuk ka në botë një kryetar bashkie që është akuzuar nga Shoqata e Ndërtuesve se ka marrë ryshfet për leje ndërtimi, dhe po ky njeri të votohet për Kryeministër!
Sepse, rrezik nuk ishte dhe nuk është as Republika e Prokurorëve dhe as Republika e Kryeministrit që mund të jenë krijuar në mendjen e ca individëve!
Rrezik real i shqiptarëve ishte dhe është, ajo e cila për 80 vjet po gërryen dhe poshtëron këtë vend, është ajo që vjedhë dhe vret, Republika e Sigurimit të Shtetit!
Që nga dita e parë kur shkeli në tokën shqiptare, Komunizmi, i solli vetëm fatkeqësi këtij vendi, ndërsa për ata që vazhdojnë dhe pyesin pse gjithë kjo vjedhje, të gjithë vjedhin dhe Edi Rama nuk arrestohet, Prokurori Antonio Di Pietro me deklaratën e tij epike jep përgjigje në këtë enigmë: Përgjegjësia penale është personale, nuk mund të sjell këtu një person me emrin Parti dhe mbiemrin Komunist!
