Rrëzohet avioni në Alaska, 10 të vdekur

Një avion i vogël pasagjerësh që u rrëzua në pjesën perëndimore të Alaskës , ndërsa udhëtonte drejt qytetit Nome, u gjet në ujrat e ngrira detare dhe të 10 personat në bord vdiqën, thanë autoritetet.

Zëdhënësi i Rojes Bregdetare të Shteteve të Bashkuara, Mike Salerno, tha se ekipet e shpëtimit po bënin kërkime me helikopter në zonën ku ishie lokalizuar për herë të fundit avioni, kur panë rrënojat.

Avioni i kompanisë Bering Air me 9 pasagjerë dhe një pilot në bord po udhëtonte nga qyteti Unalakleet, njoftoi Departmaenti i Sigurisë Publike të Alaskës.

Avioni u nis në oren 2.37 të pasdites së të enjtes dhe zyrtarët humbën kontaktin me të më pak se një orë më vonë, tha David Olson, drejtor i operacioneve në kompaninë Bering Air.

Sipas Shërbimit Kombëtar të Meteorologjisë, kishte reshje të lehta dëbore dhe mjegull, me temperatura që arrinin deri në minus 8.3 Celsius.

Avioni po operonte me kapacitetin maksimal të pasagjerëve. Të 10 personat në bord ishin të rritur.

Zhdukja e avionit shënon fatkeqësinë e tretë ajrore në SHBA, në tetë ditë. Një avion pasagjerësh dhe një helikopter i ushtrisë u përplasën pranë kryeqytetit të vendit më 29 janar, duke vrarë 67 persona. Një avion ambulancë u rrëzua në Filadelfia më 31 janar, duke vrarë gjashtë personat në bord dhe një person tjetër në tokë./VOA/