Rrëzohet kërkesa e PD, PS voton ngritjen e “Komisionit për Dezinformim”

Ndonëse Kryetari i Grupit Parlamentar të Partisë Demokratike, Gazment Bardhi, kërkoi më shumë kohë, Konferenca e Kryetareve me votat e mazhorancës që çdo ditë dezinformon shqiptarët, votoi ngritjen e Komisionit të posaçem për Dezinformimit.

Duke e konsideruar si çështje sensitive, Kryetari i Grupit Parlamentar të PD-së, tha se ngritja e Komisionit për Dezinformim nuk duhet të trajtohet si temë për konsum ditor.

“Kjo çështje është sensitive dhe duhet të trajtohet me kujdes të veçantë. Ne bashkëndajmë shqetësimin për ndërhyrjet e e shteteve të treta jo partnere nëpërmjet të gjitha formave. Mirëpo, do duhet që ju të qartësoni iniciativën, të informoni ne dhe gjithë publiku mbi çfarë do të bëjë dhe për çfarë po kërkohet.

Flisni për marrëveshje ndërkombëtare, marrëveshje me SHBA, dhe ne nuk dimë asgjë për atë marrëveshje pasi nuk na e keni vënë në dispozicion, edhe pse Kushtetuta e detyron qeverinë të na vendos në dijeni. Këto çështje që pretendohen të trajtohen në ketë komision të posaçëm mund të trajtohen fare mire ne komisionet respektive, Komisionin e Medias apo Komisionin e Sigurisë. Pse nuk mund të trajtohen aty? Do duhet të hiqet çdo dileme për ndërhyrje në lirinë e medias. Nëse nuk është ky qëllimi i fshehur, duhet të marrin kohën e nevojshme dhe mos e trajtojmë si një temë për konsum ditor.

Ka një Rezolutë të Kuvendit në 2019, e miratuat dhe e harruat. E trajtuat si temë dite dhe aq. Aty përcaktohet detyrimi që institucionet e sigurisë të sjellin raport në Kuvend, gjë që nuk e kanë bërë. Duhet të konsultohemi me shoqatat e medias, që qartësohet objekti dhe motivet, çfarë do të trajtojë dhe pse duhet,” tha Kryetari i Grupit Parlamentar të Partisë Demokratike, Gazment Bardhi.

Ndërsa Kryetari i Grupit Parlamentar të PS, Bledi Çuçi, ndonëse i takon një partie që për 11 vjet më shumë ka dezinformuar se sa që ka qeverisur sot u mundua ti bindë shqiptarët se Komisioni i Posaçëm Parlamentar ngritet me qëllim koordinimin dhe mbikëqyrjen e të gjitha përpjekjeve institucionale për të luftuar dezinformimin dhe format e tjera të ndërhyrjes së huaj në proceset demokratike në Shqipëri.

Por kur drejtuesi i partisë që shpiku Patronazhistët thotë se dezinformimi është një nga instrumentat që po përdoret gjerësisht për të cënuar vlerat demokratike, dhe për këtë arsye ngritja e këtij komisioni është e domosdoshme, qartësohet jo vetëm arsyeja pse ekzistojnë Patronazhistët por dhe arsyeja pse PS është në pushtet.

“Më vjen keq që kolegët e opozitës shohin me paranojë çdo iniciative te mazhorancës. Por nuk eshte ky rasti. Për shkak të zhvillimeve nëpër botë, vlerat e demokracisë perëndimore janë më të kërcënuara. Dezinformimi është një nga instrumentat që po përdoret gjerësisht për të cënuar vlerat demokratike. Këtë nuk e themi ne, por e thotë gjithë bota perëndimore. PE pati një rezolutë dhe një komision të posacëm për këtë punë. Ky nuk është një mekanizëm për qëllimet tona të brendshme politike, prandaj këtu duhet të jemi bashkë. Ngritja e këtij komisioni është e domosdoshme.

Do të bëjë një analizë të plotë të situatës. Mendoj se nese ky Parlament do të ketë një komision ku ne duhet të jemi në sinkron, është ky komision ku duhet të japim një analizë të detajuar se në cilin nivel ka shkuar ndërhyrja e këtyre vendeve. S’mund të jemi ne imunë kur nuk është SHBA apo vendet e BE. Eshte ne nderin tonë ta adresojmë sa më parë. Jam i bindur se ju do i bashkoheni këtij komisioni,” tha Bledi Çuçi duke dezinformuar ndërsa iu përgjigj edhe Jorida Tabakut:

“Duke iu referuar marrëveshjes me SHBA, të cilës iu referuar zonja Tabaku, ne nuk kemi detyrime, por marrim iniciativa dhe e sjellim në Parlament që të bëhet gjithëpërfshirëse. Fakti që jemi vonë nuk duhet të na bëjë të vonojmë më tepër. Objekti i këtij Komisioni të Posaçëm do të hyjë të paktën në termat e 4 komisioneve të tjera parlamentare( Komisioni i Jashtëm, Ligjet, Siguria Kombëtare dhe Edukimit) Me afat 1-vjeçar sepse fusha e veprimit të këtij komisioni është shumë e gjerë. Ekzaktësisht ky komision do të marrë në shqyrtim edhe zbatimin e ligjit të AMA që përmendi zonja Açka. Komisioni i Posaçëm i PE ka zgjatur më shumë se dy vjet dhe është marrë me të gjitha ndërhyrjet në shtetet e BE”, deklaroi Çuçi.

Në fund, për të arsyetar arrogancën parlamentare që e karakterizon, Partia Scialiste vetëm me votat e saj në Konferencën e Kryetarëve miratoi ngritjen e Komisionit për Dezinformim.