Rrëzohet kërkesa e PD për Qarkun Tiranë, KAS lë në fuqi rezultatin e KQZ për 25 Prillin

Komisioni i Ankimimeve dhe Sanksioneve, KAS, ka rrëzuar kërkesat e Partisë Demokratike dhe Boiken Abazit të Lëvizjes Vetëvendosje ku kërkuan shpalljen e pavlefshme të zgjedhjeve në Qarkun Tiranë, duke lënë në fuqi rezultatin e KQZ.

“Pasi KAS u mblodh në dhomë këshillimi, bazuar në analizën e provave dhe fakteve me shumicë votash vendosi rrëzimin e kërkesës ankimore të paraqitur nga koalicioni PD-AN, rrëzimin e kërkesës ankimore nga kandidati z.Boiken Abazi, lënien në fuqi të vendimit të KQZ për miratimin e tabelës përmbledhëse për qarkun e Tiranës për subjektet zgjedhore dhe kandidatët për deputet në zgjedhjet e 25 prillit. Ky vendim hyn në fuqi. Kundër tij bëhet ankimi në Kolegjin Zgjedhor,” tha relatori Ledio Braho.

Ky vendim i Komisionit të Ankimimeve erdhi edhe pas kërkesës së KAS kur administrata e KQZ zbardhi përmes kryqëzimit të të dhënave nga pajisja e identifikimit elektronik, PEI, dhe konfirmoi se në zgjedhjet e 25 Prillit, në Qarkun Tiranë, 51 qytetarë dyshohet se kanë votuar 123 herë në Qendra te ndryshme Votimi. Tre persona kishin votuar nga dy herë me të njëjtën kartë identiteti në Qendra të ndryshme Votimi; Ndërsa, me shenjën e gishtit, 48 persona kanë votuar plot 117 herë.

Pas këtij vendimi të KAS, Partia Demokratike dhe Boiken Abazi kanë paralajmëruar se do ta çojnë çështjen në Kolegjin Zgjedhor.