Rrëzohet lisi në Prishtinë, një i vdekur e një e lënduar  

Një person ka mbetur i vdekur dhe një tjetër është lënduar, si pasojë e rrëzimit të një lisi në lagjen Pejton, në Prishtinë.

Policia e Kosovës, ka konfirmuar se në lagjen Pejton në Prishtinë, nga rrëzimi i një lisi si pasojë e erërave të forta, ka humbur jetën një 30 vjeçar dhe është lënduar një 30 vjeçare.

“Rreth orës 15:15 kemi pranuar informatëm se një lis është rrezuar dhe ka zënë dy persona. Policia menjëherë ka dalë në vendin e ngjarjes dhe nga informatat e para janë ngritur dyshimet se njëri nga të lënduarit mashkull, rreth 30 vjeç ka humbur jetën përderisa e lënduara tjetër femër poashtu rreth 30 vjeç është dërguar në QKUK për trajtimin e nevojshëm mjekësor.

Aktualisht policia ka nisur ndërmarrjen e veprimeve hetimore me synim sqarimin e rrethanave të ngjarjes,” thekson për RTK, zëdhënësja e Policisë për rajonin e Prishtinës, Flora Ahmeti.

Kryetari i Komunës Prishtinë, Përparim Rama, ka shprehur ngushëllime për burrin që vdiq sot nga lisi që u rrëzua prej stuhisë, ndërsa qytetarëve të tjerë u ka kërkuar të kenë kujdes.

“U bëj thirrje të gjithë qytetarëve që të kenë kujdes të shtuar nga rreziqet potenciale që mund të shkaktohen nga moti i keq i paralajmëruar për ditët në vijim,” u shpreh Kryetari i Komunës Prishtinë në reagimin e tij përmes rrjetit social Facebook duke i kërkuar qytetarëve të tjerë të kryeqytetit që të kenë kujdes të shtuar në vendet ku llogaritet të ketë rrezik.