Rritet çmimi i naftës, arsyet tashmë janë të qarta

Çmimi i naftës është rritur në tregun ndërkombëtar për shkak të shqetësimit për furnizim në kulmin e tensioneve në mes Rusisë dhe Ukrainës si dhe atyre në Lindjen e Mesme.

Në tregun londinez bareli është rritur për 33 cent duke arritur vlerën 88.22 dollarë ndërsa në tregun amerikan çmimi i barelit është rritur për 24 cent përkatësisht 85.38 dollarë.

Pas tërheqjes së trupit diplomatik amerikan nga Ukraina shqetësimi për ndërprerjen e furnizimit të Evropës Lindore është rritur ndërkohë pritet që me rritjen e tensioneve në konflikt, do të goditet edhe tregu i karburanteve dhe ai i gazit.

Me gazin rus furnizohet rreth 35 për qind e Evropës dhe sot Rusia është shprehur se do të ngelet furnitori i besueshëm me energji në Evropë edhe në periudha konfliktuoze të marrëdhënieve të ndërsjellta.

Në Lindjen e Mesme, Emiratet e Bashkuara Arabe kanë shkatërruar dy raketa balistike të cilat Huthët i kanë lëshuar drejt këtij shteti, si përgjigje ndaj sulmit vdekjeprurës të një jave më parë.

Barclays ndërkohë i ka rritur vlerësimet e çmimit mesatar të barelit të naftës për këtë vit për 5 dollarë, duke theksuar uljen e kapaciteteve të lira dhe rritjen e riskut gjeopolitik. Kjo bankë ka rritur vlerësimet e saj për çmimin e barelit në vitin 2022 në 85 dollarë në Londër, përkatësisht 82 dollarë në tregun amerikan.

Çmimi i naftës në të dyja tregjet është rritur gjatë javës së kaluar për të pestën herë me radhë, në plus për 2 për qind, nivel ky më i larti që nga tetori i vitit 2014. Këtë vit, këto çmime janë rritur për më shumë se 10 për qind për shkak të shqetësimit nga mungesa e ofertës, dhe është e qartë se nuk janë harmonizuar me tregjet globale të aksioneve, të cilat janë nën presionin e shitjeve të mëdha që shkakton shqetësimi për shkak të politikës monetare që mund të jetë më e rreptë në gjithë botën.

Kështu edhe tregu i naftës është nën tension, OPEC+ po bënë luftë që të arrij rritjen e synuar mujore të prodhimit me 400 mijë barel në ditë. OPEC në raportin e saj të ndarë thekson se bareli i naftës të premtën ishte 87.46 dollarë, që do të thotë se e ka ulur çmimin për 1.09 dollarë në krahasim me ditën paraprake të tregtimit.