Rritet numri i të prekurve me koronavirus në Evropë, por jo në Suedi

Derisa shumë shtete evropiane vazhdojnë të shënojnë rritje të mëdha të numrit të të prekurve me koronavirus, Suedia ka njërën prej niveleve më të ulëta në Evropë. Sipas të dhënave të Qendrës evropiane për parandalim dhe kontroll të sëmundjes, ECDC, ky shtet skandinav dje kishte pasqyrën dyjavore të rasteve të reja në ditë 22.2 në 100.000  banorë. Ndërkohë Spanja ka 279, Franca 158.5, Çekia 118, Belgjika 77,  Britania e Madhe 59, dhe të gjitha këto shtete në pranverë për dallim nga Suedia kishin lockdown, shkruan e përditshmja birtanike The Guardian.

Madje 23 nga 31 shtetet evropiane që vëzhgohen nga ECDC kishin nivele më të mëdha të infeksionit. Rastet e reja, për të cilat në Suedi tani do të raportohet nga e marta në të premten, po paraqiten në nivelet e fundmarsit, e të dhënat e Agjencisë kombëtare të shëndetit publik tregojnë se vetëm 1.2 për qind prej 120.000 testeve nga java e kaluar ishin pozitive.

Tegnell: Nuk ka përhapje të koronavirusit

Suedia ka madje më pak raste të reja në ditë edhe në krahasim me fqinjët nordik Norvegjia dhe Danimarka. Aktualisht në trajtim intensiv në spitalet suedeze janë 15 pacientë me  COVID-19.

“Nuk kemi përhapje të koronavirusit siç kanë shumë shtete tjera. Në fund do të shohim se cili është dallim që bënë strategjia e cila është e qëndrueshme, në vend të strategjisë me lockdown, pastaj hapje, dhe sërish lockdown dhe kështu nga fillimi,” tha për televizionin francez France-24, epidemiologu kryesor në Suedi dhe arkitekti i strategjisë pa lockdown, Anders Tegnell,  duke shtuar se vendi i tij është i kënaqur me strategjinë në tërësi.

Maskat nuk rekomandohen, ndalohen tubimet e më shuëm se 50 njerëzve

Për dallim nga shtetet tjera, Suedia ka mbyllur shkollat për nxënësit mbi 16 vjeç, por jo dhe për më të rinjtë, duke insistuar në vijimin e mësimit. Shkollat dhe Universitetet tani janë hapur sërish. Gjithashtu ndalohet tubimi i më shumë se 50 njerëzve e personave më të moshuar se 70 vjeç  dhe grupeve me risk të lartë i rekomandohet vetëizolimi.

Nga popullsia 10-milionëshe e Suedisë është kërkuar, jo urdhëruar, që të mbajnë distancën fizike dhe të punojnë në shtëpi, nëse kjo është e mundur, gjë të cilën shumica e kanë pranuar. Dyqanet, baret, restorantet dhe palestrat kanë vazhduar të jenë të hapura  dhe për momentin maskat nuk rekomandohen, shkruan Guardian.

Tegnell: Strategjia suedeze e qëndrueshme

Tegnell ka insistuar se qëllimi nuk është krijimi i imunitetit të tufës, por ngadalësimi i përhapjes së virusit në mënyrë që institucionet shëndetësore ta përballojnë pandeminë. Mirëpo, tha ai, strategjia suedeze u dëshmua e qëndrueshme afatgjate. Ajo u sulmua në fillim të vitit kur numri i rasteve të vdekjeve nga koronavirusi shkoi në 574 për 1 milion banorë.

Suedia e ka nivelin pesë herë më të madh se Danimarka dhe 10 herë më të madh se Norvergjia e Finalnda, por  nivel më të vogël se sa disa shtete që kanë vendosur lockdown, si Britania e Madhe, Spanja dhe Italia.

Tegnell për France-24 tha se niveli i madh i vdekshmërisë nuk ka lidhje me strategjinë, por me suksesin në parandalimin e përhapjes katastrofike të koronavirusit nëpër azile, ku ka ndodhur shumica e 5.846 rasteve të vdekjes në Suedi.

“Natyrisht, aty di çka shkoi keq,” tha Tegnell.

Dje qeveria mori vendim që nga tetori të heq ndalimin e vizitave në azile e cila është vendosur më 1 Prill. “Rrezik është që të hiqet ndalimi. Dëshiroj që secili të merr përgjegjësi,” tha ministrja për çështje sociale, Lena Hallergren.

Drejtori i Entit suedez për Shëndetësi, Johan Carlson,  javën e kaluar tha se strategjia është e suksesshme sepse mesazhet për qytetarët ishin të qarta dhe të qëndrueshme duke vendosur theksin mbi përgjegjësitë personale:

“Strategjia suedeze ishte e qëndrueshme. Mendoj se tani  rreziku është më i vogël për përhapjen e infeksionit se sa që e kanë shtetet tjera,”tha profesori i epidemiologjisë në Institutin e Karolinës në Stockholm, Jonas Ludvigsson. Franca të shtunën kishte 10.561 raste të reja në ditë, më së shumti qysh se filloi pandemia. Spanja gjithashtu shënoi rritje të frikshme, e në fillim të muajit shtator ishte vendi i parë evropian me 500.000 të infektuar. Çekia të dielën kishte rritjen më të madhe të infektuarve për tri ditë me radhë, ndërsa numër të madh ka shënuar edhe Britania e Madhe, përfundon The Guardian.