Rritja e infektimeve, 4 spitalet COVID plotë, Manastirliu: Kalojmë në skenarin e parë…
Pas ezaurimit të kapaciteteve në 4 spitalet COVID-19, Ministrja e Shëndetësisë raporton se ka filluar skenari i parë i përfshirjes së spitaleve rajonale në Shqipëri.
Sot Manastirliu ka inspektuar pavionin e COVID-19 në Durrës në spitalin rajonal ku paralajmëron se pas këtij spitali do të vijohet me Shkdorën, Korçën, Vlorën e Elbasanin që do të bëjnë që të shtohen edhe 430 deri në 630 shtretër.
Sipas ministres, stafi në këto spitale është trajnuar ndërsa investimet janë përfunduar, dhe nga sot ato presin pacientët e parë me COVID-19.
”Eshtë një moment delikat, pasi shihet që kemi një incidencë në rritje të infektimeve dhe sigurisht dhe fakti që 90% e kapaciteteve më 4 spitalet COVID në Tiranë tashmë janë ezauruar, kjo na bërë që të kalojmë në skenarin e parë për hapjen e spitaleve rajonale, ku fillojmë sot me hapjen e Spitalit Rajonal të Durrësit, me pavion të dedikuar dhe gjithashtu në Spitalin Rajonal të Shkodrës e më pas do të vijojmë me Spitalin Rajonal të Korçës, Vlorës, Elbasanit, në skenarin e parë. Me këtë skenar, vendosim në dispozicion të qytetarëve nga 430 deri në 630 shtretër, që i shtohen kapaciteteve të spitaleve të Tiranës,” tha Ogerta Manastirliu duke përfunduar:
“Eksperienca e fituar nga stafet mjekësore si dhe me investimet që kemi bërë në spitalet rajonale, jemi të angazhuar t’i përgjigjemi nevojave dhe puna nuk po ndalet në asnjë moment, që t’i sigurojmë qytetarëve kushtet optimale për trajtimin e dukur mjekësor.”
Reagimi i plotë:
Spitali Rajonal #Durrës – Ministrja Ogerta Manastirliu me stafin mjekësor të pavionit të dedikuar COVID, ku sot nis trajtimi i pacientëve me COVID19, duke aktivizuar skenarin e parë të përfshirjes së spitaleve rajonale.
– Nga 430-630 shtretër, i shtohen kapaciteteve aktuale të dedikuara për pacientët me COVID19, ku stafi është trajnuar dhe janë përfunduar investimet për sigurimin 100% të linjave të oksigjenit, pajisjet jetëshpëtuese në terapinë intensive dhe furnizimi me barnat e nevojshme.
– Nuk do të reshtin përpjekjet tona dhe të stafeve mjekësore për t’ju përgjigjur nevojave të qytetarëve, por është #thelbësor bashkëpunimi, për të ndalur zinxhirin e infeksionit.
