Rritja e rasteve me COVID-19 në Kosovë, paralajmërohen masa për kufizimin e orarit të gastronomisë

Në mbledhjen e sotme të Komitetit për koordinim dhe vlerësimin e situatës epidemiologjike është diskutuar për vendosjen e masave të reja Anticovid. Ministri i Shëndetësisë i Kosovës, Rifat Latifi ka deklaruar se janë duke biseduar për masa të reja kufizuese, ku po shqyrtohet mbyllja e lokaleve në ora 22:00.

Pas mbledhjes, Ministri i Shëndetësisë, Rifat Latifi, tha se do të ketë ndryshim të masave, konform situatës epidemiologjike.

“Natyrisht se do të ketë ndryshim të masave. Këto masa do të jenë në proporcion me zhvillimet dhe përhapjen e rasteve, COVID-it. Do të jenë në proporcion me nevojat për zhvillimin e fëmijëve në shkolla, me mbajtjen e shkollave hapur, me mbajtjen e ekonomisë hapur”, deklaroi Latifi.

Ai ka treguar se me masat e reja, lokalet e gastronomisë mund të mbyllen në orën 22:00.

“Është shumë e mundshme që lokalet duhet të mbyllen në orën 22:00, por këtë do ta vendosim bashkërisht të gjithë. Do ta dorëzojmë në Qeveri sot pasdite, ose nesër në mëngjes”.

Rishqyrtimi i masave anti-COVID vjen pas rritjes së madhe të rasteve me koronavirus.

Siç ishte paralajmëruar, në këtë takim ishte planifikuar diskutimi i mundësisë për vendosjen e masave të reja pas rritjes enorme të rasteve me COVID-19.

Nga objekti i Qeverisë të enjten në mëngjes pas mbledhjes janë parë duke dalë ministrja e Arsimit, Arbërie Nagavci, ai i Brendshëm, Xhelal Sveçla dhe ministri i Shëndetësisë, Rifat Latifi.

Ndërkaq, ministrja e Arsimit, Arbërie Nagavci, ka thënë se shteti ka interesim që t’i mbajë shkollat hapur, pavarësisht rritjes së rasteve pozitive te fëmijët.

Ajo ka bërë të ditur se sot gjatë ditës do të mblidhet task-forca e kësaj ministrie për të diskutuar për situatën e krijuar dhe nesër prapë do të ketë takim.

Rritja e numrit të nxënësve të infektuar me koronavirus ka bërë që disa shkolla në vend të kalojnë në skenarin C të mësimit, atë online.

Deri tani në Prishtinë në mësimin online kanë kaluar shkollat fillore “Ismail Qemali”, “Faik Konica”, dhe në Gjakovë tri shkolla “Yll Morina”, Shkolla e Mesme Ekonomike “Kadri Kusari” dhe Shkolla e Mesme Teknike “Nexhmedin Nixha”.

Edhe në Pejë ka raste të fëmijëve dhe mësimdhënësve të infektuar me coronavirus por që ende nuk ka shkolla që kanë kaluar online.

Vetëm të mërkurën u regjistruan 2050 raste të reja pozitive, duke e vazhduar trendin ngritës. Aktualisht janë mbi 7200 raste aktive me COVID-19

Rritje enorme e rasteve aktive me COVID-19 është shënuar në ditët e para të vitit 2022 në Kosovë. Përderisa më 1 janar ishin 492 raste aktive me këtë virus, sot, 19 ditë më vonë numri ka shkuar në mbi 7200.

Prishtina prin si qytet me 3214 raste aktive, duke u ndjekur nga Mitrovica me 611 e Peja me 372.

Aktualisht në Kosovë vlejnë masat kufizuese të ndërmarra gjatë vitit 2021, ku pas orës 24:00 deri në ora 05:00 vlen ora policore, ndërsa, nga 3 janari në Kosovë mund të hyjnë vetëm qytetarët që kanë marrë dy dozat kundër koronavirusit./Monitor/