Rritje rekorde e ekonomisë kineze

Ekonomia e Kinës u rrit për 18.3 për qind në tremujorin e parë të këtij viti, krahasuar me të njëjtin tremujor të vitit të kaluar.

Autoritetet thanë se kjo është rritja më e madhe e prodhimit të brendshëm bruto, që kur Kina ka nisur të bëjë raporte tremujore, në vitin 1992. Megjithatë, raporton RFE, shifra është më e ulët se pritshmëria e ekonomistëve që parashikonin një rritje prej 19 për qind.

Në tremujorin e parë të vitit 2020, ekonomia e Kinës është tkurrur për 6.8 për qind, për shkak të izolimit mbarëkombëtar nga sëmundja COVID-19.

“Ekonomia kombëtare bëri një start të mirë”, tha Byroja Kombëtare e Statistikave të Kinës, e cila publikoi sot të dhënat e çerekut të parë.

“Ne duhet të jemi të vetëdijshëm se COVID-19 është ende duke u përhapur globalisht dhe peizazhi ndërkombëtar është i ndërlikuar – me pasiguri dhe paqëndrueshmëri të mëdha,” tha Byroja e Statistikave.

Kina ka vendosur një objektiv të rritjes ekonomike prej 6% në vitin 2021.