Rruga e Vjedhjes së Kombit!

E quajti “Rruga e Asgjëkundit” por nuk e përfilli njeri dhe e pagëzuan “Rruga e Kombit”. Konsumatorët e kësaj Rruge që kryesisht vinin nga Kosova i përçmoi dhe i quajti Turistë Patriotik. Dhe, kur erdhi në pushtet, e shijoi vetë këtë Rrugë, i erdhi vërdallë dhe në fund i vendosi taksën 5 euro.

Por ky vendim i kryeministrit me ndjeshmëri të madhe antikosovare, Edi Rama, u pritë me protesta, të cilat me urdhër politik përshkallëzuan në dhunë. Në dhunë, e cila me pamje filmike dëshmoi se policët nuk ishin udhëzuar të përdorin gazin lotsjellës dhe shkopin e gomës, por gurët që në pikën ku është vendosur Trau i Qetit të Kastratëve, ka me bollëk.

Nga 31 Marsi 2018, kur u zhvillua kjo protestë dhe qytetarët e Kukësit i bënë të qartë kryeministrit Edi Rama se nuk pranojnë asnjë lloj takse për të lëvizur në Rrugën e Kombit e cila është paguar nga qytetarët, ndërkohë që paguajnë dy lloj taksash për mirëmbajtjen e rrugës, Qeveria vetëm se ka pranuar gabimin që nuk është investuar në dëgjesat me banorët e zonës për vendosjen e kësaj takse para se të arrij Marrëveshje me koncesionarin. Gjithçka tjetër ishte frikësim, shantazh dhe terror, në rastin më të mirë, ndaj atyre që protestuan më 31 mars, dhe për ti dhënë një leksion komunist, siç bënë etërit e Qeverisë së Edi Ramës, arrestoj disa prej protestuesëve.

Propagandë dhe Terror

Të gjithë ata që vijnë nga Kosova dhe kalojnë në Rrugën e Kombit kishin rastin të dëgjojnë pas kësaj proteste, mesazhe përmes videoklipeve të Qet Katsratit me regji të Edi Ramës se cila është kostoja e ndërtimit të plotë të kësaj autostrade si dhe mirëmbajtjes që e bënë atë më të sigurt.

Për të mos ju kthyer fakteve të shumëta që “Pa Frikë” ka dhënë për tarifat më të larta që mendon ti zbatoj kjo Qeveri, për ato që zbatohen në vendet fqinje dhe propozimet që kanë ardhë edhe nga banorët e Kukësit për “Vinjetën” dhe taksat e ndryshme që zbatohen për përdorimin e autostradës, taksa të cilën e ka “korigjuar”  Edi Rama është edhe më kriminale.

Videodëgjesat që bëri Qeveria Rama me veten e vetë, duke komunikuar me punëtorët e Prefekturës së Kukësit për syrin e ERTV dhe televizioneve me liçencë kombëtare dhe jo vetëm, që i ka nën kontrolluar kryeministri edhe pse i etiketon KAZAN, dhanë një produkt shumë më kriminal që sërish ngjizi tension.

Nga 17 shtatori 2018 u tha se do të paguhet 5 euro ose 660 lekë ndërsa për banorët e Qarkut të Kukësit 100 lekë. Sërish vjedhje dhe mospërfillje për Qarkun e varfër të Kukësit, që qartë i tha kryeministrit Edi Rama se e pranojnë vetëm taksën zero. Edhe pse u  mundua me propagandë të tregoj se krahasuar me të tjerët, ata kishin shumë simbolike, kuksianët e pritën me vendimin e tyre të prerë dhe të qartë, zero!

Po çfarë ofron Edi Rama dhe Qeti i Kastratëve me 100 lekëshin përkatësisht 660 lekëshin.

Së pari me taksën prej 5 euro ose 660 lekë. Pa u konsultuar fare me Bankën e Shqipërisë, “Pronari i Shqipërisë” dhe “Pronari i Kukësit”, kursin zyrtar të euros – 127 lekë e bënë 132 lekë, dhe çmimin e kalimit prej 5 euro e bënë 5.20 euro. Pra, përveç vjedhjes, shkelën Ligjin tri herë, me Marrëveshjen që vetë e qëndisën: shpërfillën kursin e Bankës së Shqipërisë, çmimin e kalimit e bënë në mënyrë arbitrare 5.20 euro, dhe ishin Edi Rama dhe Qeti i Kastratëve ata që vendosën të vjedhin qytetarët e Kosovës dhe jo vetëm, me 0.2 euro për çdo kalim. Dhe jo vetëm kaq!

Shkeljet shtohen për rastet:

-Automjetet komerciale me dy akse, 6 rrota-1490 lekë, që i bie 11.75 euro,
-Kamionë të mesëm dhe autobusë të rëndë 2.140 lekë që i bie 16.85 euro, dhe
-Kamionë të rëndë me 4 akse dhe më shumë 2.970 lekë që i bie 23.40 euro, që si taksë e cila rëndon biznesin, patjetër që do të reflektohet në xhepin e qytetarit i cili do ta shlyej këtë çmenduri PPP-je.

Dhe, janë qytetarët e Kukësit, ata të Qarkut më të varfër, kërkesat e të cilëve nuk u përfillën fare. Jo vetëm që nuk u punua në këtë drejtim, por me tensione, shantazhe dhe terror, në prag të 17 shtatorit kur Edi Rama dhe Qeti mendojnë ta fusin në zbatim këtë taksë, arritën të detyrojnë kryetarin e shkretë të Këshillit të Bashkisë Kukës, Gjelbrim Shehu, që të dal në publik dhe të deklarojë se ky Këshill e ka pranuar taksën prej 100 lekësh dhe ajo është e pranueshme për qytetarët e Kukësit.

“Lidhur me analizën, diskutimin mbi vendosjen e tarifës së rrugës së Kombit sqaroj se kjo çështje quhet e mbyllur dhe nuk do të jetë më pjesë e rendit të ditës së mbledhjeve të Këshillit të Bashkisë pas reflektimit nga ana e qeverisë shqiptare dhe koncesionarit, të tarifës prej 100 lekësh e caktuar për banoret e qarkut të Kukësit, e cila është e pranueshme dhe e përballueshme për të gjithë,” thotë Gjelbrim Shehu i shkretë pas një mbledhje imagjinare të Këshillit të Bashkisë së Kukësit e cila ishte bojkotuar nga këshilltarët socialistë të Këshillit, nga pjesëtarët e Prefekturës dhe Ministritë e linjës, me një arsye madhore: mbledhja ishet kërkuar nga Këshilltarët e djathtë, dhe kishte për qëllim analizën e situatës së krijuar pas vendimit të Qeverisë.

Por pesë muajt që kaluan nga protesta e 31 marsit nuk ishin zhgënjyes vetëm për qytetarët e Kukësit që do të penalizohen me këtë vendim të Qeverisë. 150 ditët që kaluan, dëshmojnë se Edi Rama ka punuar vetëm për të përçarë Këshillin e Bashkisë së Kukësit i cili në protestat e 31 marsit ishtet i qartë, dhe para interesave partiake vendosi ato të qytetarëve të Kukësit.

Sot Edi Rama mund ta ketë thyer në mes Këshillin Bashkiak të Kukësit, por jo edhe shqiptarët të cilët tashmë e kanë të qartë se qeverisen nga një qeveri mashtruese. Jo vetëm kuksianët e dijnë se 100 lekët e Edi Ramës dhe Qetit nuk janë 100 lekë. Menyja e tyre thotë se ky çmim vlenë vetëm 44 kalime në muaj; e ata që mendojnë se me motoçikletë ja kanë hedhur, janë mashtruar sepse duhet të paguajnë 50 lekë, sikur të shkojnë edhe nga Kalimashi në Fan.

Por çudirat e Edi Ramës nuk përfundojnë këtu. Edhe për ata kuksianë që mbajnë syzet e Edi Ramës dhe Qetit të Kastratëve për të parë realitetin shqiptarë, panorama është e frikshme. Me vendimin e Qeverisë, taksa mund të bëhet zero, por duhet një angazhim qytetar, që të ngelesh invalid në punë! A ja vlenë?! Natyrisht që jo, por kështu e ka menduar kuksianin në Shqipëri, Qeveria dhe dora vetë, Edi Rama.

E ata që nuk mendojnë si Edi Rama dhe vazhdojnë ta përjetojnë këtë Rrugë, jo siç e ka makth Edi Rama si Rrugë të Saliut, por vërtetë si Rrugë të Kombit, e cila edhe prakitikisht e ka bashkuar këtë popull të ndarë padrejtësisht, nuk do ta lejojnë tjetërsimin e saj. Aq më shumë kur pisllëku i Qetit të Kastratëve me Edi Ramën, më shumë po e çon drejtë një pagëzimi të pashmangshëm, Rruga e Vjedhjes së Kombit!