Rruga Qukës–Qafë Plloçë/ U inaugurua më 5 shtator nga Rama-Balluku, nis të degradohet 

Në fillim të aksit të ri rrugor Qukës-Qafë Plloçë, ka filluar një rrëshqitje dherash pasditen e së mërkurës në në një prej skarpateve. Për fat të mirë nuk pati dëme, por shqetësimet për sigurinë dhe qëndrueshmërinë e kësaj rruge janë shtuar, e cila u përurua më 5 shtator, pas 14 vitesh punime dhe me një kosto marramendëse prej 260 milionë eurosh.

Kompania kontraktore ndërhyri për pastrimin e rrugës, dhe punimet për stabilizimin e terrenit vijojnë edhe gjatë ditës së sotme. Por, kujtojmë se vetëm pak javë më parë, një rrëshqitje shkëmbore në të njëjtin aks bllokoi për orë të tëra njërën korsi të qarkullimit.

Kështu, rruga që pritej të ishte një investim strategjik për lidhjen Lindje-Perëndim po kthehet në shembull të mungesës së përgjegjësisë dhe keqmenaxhimit të fondeve publike, sot kur mungon transparenca dhe cilësia në çdo fazë të ndërtimit.

Ndryshe, rruga e re kombëtare Qukës–Qafë Plloçë, u inaugurua nga kryeministri Edi Rama dhe ministrja e Infrastrukturës, Belinda Balluku, më 5 shtator të këtij viti.