Rusi, vaksinim në shkallë të gjerë kundër COVID-19 gjatë muajit tetor

Rusia planifikon që të zbatojë vaksinim në shkallë të gjerë kundër COVID-19 në muajin tetor, tha ministri i Shëndetësisë së Rusisë, Mikhail Murashko.

Duke folur për gazetarët, Murashko shtoi se mësuesit dhe punëtorët shëndetësorë do të jenë prioritet në këtë program vaksinimi. Megjithatë, ai nuk dha më shumë detaje rreth vaksinës apo këtij programi të vaksinimit.

Më herët gjatë javës, Agjencia e lajmeve Reuters, duke iu referuar një burimi anonim, raportoi se vaksina e parë potenciale për COVID-19 e Rusisë pritet të marrë miratimin e qeverisë në muajin gusht.

Rusia raportohet se ka zhvilluar dy vaksina, një është zhvilluar nga Instituti Gamaleya në bashkëpunim me Ministrinë e Mbrojtjes dhe një vaksinë tjetër po zhvillohet nga laboratori shtetëror për kërkime Vektor.

Gjatë dëshmisë së tij para Kongresit amerikan më 31 korrik, , raporton RFE, zyrtari kryesor i SHBA-së për sëmundje ngjitëse Anthony Fauci, shprehu shqetësimin e tij lidhur me raportimet se vaksinat kundër COVID-19 po zhvillohen në Rusi dhe Kinë.

“Shpresoj që kinezët dhe rusët po i testojnë vaksinat përpara se t’ua japin ato qytetarëve”, tha Fauci.