Rutte dhe Ambasadorët e NATO-s vizitojnë Kosovën

Sekretari i Përgjithshëm i NATO-s, Mark Rutte, së bashku me Këshillin e Atlantikut të Veriut që përfshin ambasadorët e 32 shteteve anëtare të Aleancës Veriatlantike, do të vizitojë Kosovën javën e ardhshme.

Kjo do të jetë vizita e parë e Mark Ruttes në cilësinë e Sekretarit të Përgjithshëm të NATO-s, prej se ai mori këtë post në tetor të vitit të kaluar,.

Para Kosovës, Rutte do të qëndrojë një ditë në Bosnje Hercegovinë, por pa shoqërimin e ambasadorëve tjerë.

Vizita në Kosovë është planifikuar për 11 mars. Këtë vizitë e kishte paralajmëruar edhe vet Rutte më herët.

Ndërkohë dje Sekretari i Përgjithshëm i Aleancës ka biseduar me Presidentin e Serbisë, Aleksandar Vuçiç, me ç’rast ka paralajmëruar se presidenti serb do të vizitojë së shpejti selinë e NATO-s në Bruksel.

Vizita e parë në cilësinë e Sekretarit të Përgjithshëm të NATO-s është menduar të zhvillohet pas zgjedhjeve në Kosovë. NATO, tashmë, ka bërë të ditur se do bashkëpunojë me cilëndo qeveri që formohet në vend.