“Saimir Tahiri”/ Trafikant i drogës apo Burrë, vendimi në orën 16:00. Pas trafikantit…
Gjykata e Krimeve të Rënda është tërhequr për të marrë vendimin për Ish-Ministrin e Brendshëm, Saimir Tahiri, për ta dhënë vendimin në orën 16:00 por sot u kuptua se sikur të mos ishte prezent në seancë Përfaqësuesi i Ambasadës amerikane, i akuzuari si Organizator i Grupit të Srukturuar Kriminal dhe trafikanti ndërkombëtar i drogës do të vazhdonte të ishte Ministër i Brenshëm.
Burri, siç e cilësoi avokati Maks Haxhia edhe pse sot tregoi se ishte më shumë se aq, foli për të gjithë në mbrojtjen e tij, por emailet dhe gjërat që i quajti prova ai nuk i deponoi si prova ndonëse u shqetësua kot Mimi Kodheli për goditjet nën brez.
“E vetmja gjë që më implikon mua është shitja e makinës te Artan Habilajt, një person i cili nuk është as nën hetim as i dënuar dhe unë po mbaj përgjegjësi për vëllezërit e këtij personi, kur ka njerëz që nuk mbajnë përgjegjësi për vëllezërit e tyre. Jam i sigurt që të gjithë kemi nga një kushëri budalla, kriminel në fis, por askush nuk mban përgjegjësi,” tha ai ndërsa foli me kode edhe për vëllain e Fatmiri Xhafës dhe e pranoi se nuk është shefi i madh, sepse Edi Ramën e pranon si të tillë.
“Punova si ministër edhe kur më vunë bombat në shtëpi,” tha Saimir Tahiri ndërsa treoi para gjykatës si ata militantët odrinerë foto me Edi Ramën:
“Në momentin që këta personat flisnin për dreka me shefin e madh, unë kam qenë në një drekë bashkë me ministra të tjerë, të mbledhur nga kryeministri. Takimi është pasqyruar edhe në media. Ja ku kam qenë, në foton ilustruese të lajmeve në media jam unë dhe Kryeministri. Asnjë nga ne nuk është shefi i madh, ai është shefi i madh, por për qeverinë.”
Me hendikapin e madh të pranisë së ndërkombëtarëve në seancën gjyqësore, Saimir Tahiri nuhati prangat, ndërsa lotët të gjithë i panë përveç Maks Haxhisë:
“Për ju kjo është vetëm një çështje, për prokurorët është vetëm një çështje, për gazetarët është vetëm një çështje, për mua kjo ështe jeta ime. Vendimi në fund është në duar tuaja, por nëse në ato fashikuj ka vetëm një provë që më lidh mua me trafikun e narkotikëve, unë shkojë vetë në burg. I them këtyre faleminderit që më hapet sytë që paskam ndihmuar me veprimet e mia dhe shkojë në burg, por s’do gjeni,” tha Saimir Tahiri duke ngatërruar trupin gjykues me militantët që po e prisnin jashtë dhe i takojnë partisë së përbashkët kriminale.
Tre gjyqtarët, që nuk e kanë në dorë fatin e Ish-Ministrit Saimir Tahiri në dorë, siç pretendon ai sepse vetë e ka qepur, Ardit Mustafai, Flora Hajredinaj dhe Irena Gjoka e bënë të qartë se vendimi nuk do të jepet para orës 16:00 .
Ndërkohë Maks Haxhia i gatshëm të ulëras dhe të hipë mbi tavolinë mbi Saimir Tahirin, njeriun që lejoi kanabizimin e Shqipërisë e cilëson burrë. Nuk dihet nëse shqiptarët janë injorantë apo ky është një zbulim i ri i një avokati shqiptar, por ata që bota i quan trafikantë Maks Haxhia i quan burrë. Gjithsesi ai thotë:
“Nuk ishte në lot, ai ka dhënë mandatin për këtë, ka treguar se është burrë. Ishte një gjendje emocionale, sepse vihet në rrezik jeta e tij. Në vend që të vlerësohej për punën si ministër, ai vihet përballë akuzave, kur nuk ka asnjë provë. Të gjykosh ish-ministrin për vepra tepër të rënda, pa asnjë provë, është të ulërasësh, të hipësh mbi tavolina. Me aq sa e njoh dosjen dhe e njoh shumë mirë, nuk e di ku gjykata, në rast çmendurie, do ta gjejë një provë të vetme.”
Sidoqoftë, nëse del “burrë” siç thotë avokat Maks Haxhia, shumë shpirta do të qetësohen. Por nëse vendimi i gjykatës thotë atë që është, trafikant, atëherë shumë trafikantë të drogës që kanë punuar me të do të futen në ato vrima që ka kohë që i kanë pikasur!
