18 Dhjetori i Edi Ramës, Berisha: Kuvendi Kombëtar do të mbahet më 11 Dhjetor!
Pasi Kryetari i Partisë Demokratike, Lulzim Basha, shpalli 18 Dhjetorin si ditën e mbajtjes së Kuvendit Kombëtar, ka reaguar lideri historik i PD Sali Berisha duke theksuar se këtë datë e ka caktuar Edi Rama ndërsa e krahasoi situatën e krijuar me fillimin e viteve ’90, kur komunistët bënin përpjekje për të shkatërruar iniciativat për pluralizmin.
Me këtë rast, Ish-Presidenti Sali Berisha siguroi 4.200 delegatët se Kuvendi Kombëtar i PD do të mbahet ashtu siç kishin firmosur në formular, 11 Dhjetor, dhe po me atë Rend të Ditës!
“Unë dola para jush sepse Edvin Kristaq Rama, njëlloj si dajë Koleka e tij në vitin 1991, më 11 dhjetor propozonte që t’i futeshin tanke pluralizmit, edhe ky pasardhës besnik i tij, me peng-Bashën, përpiqet që të minojë përpjekjen madhore të shqiptarëve, revolucionin.
E them këtë sepse sot, pasi prej disa ditësh u dorëzuan në selinë e PD 4200 firma të delegatëve të Kuvendit të PD, të cilët konstatojnë dhe ndjejnë se në Shqipëri, PD është shndërruar në një fasadë të pushtetit, 4200 guximtarë dhe guximtare u ngritën mbi të gjitha format banale, të pandershme dhe të turpshme të presioneve dhe firmosën për rivendosjen e pluralizmit, për çmontimin e narkoshtetit, firmosën për një të ardhme për shqiptarët në vendin e tyre,” tha Sali Berisha duke shtuar:
“Një sjellje e tillë më rikujton mua qëndrimet e Pallateve të Kuqe në dhjetor ndaj studentëve të vitit 90 ndaj studentëve. Përpërlitjet e tyre për të dështuar atë lëvizje të bekuar që i dha fund epokës së monizmit në Shqipëri. Përpjekjet të tilla për të bllokuar në një mënyrë apo në një tjetër vullkanin, apo këtë lëvizje vullkani, janë sa qesharake dhe të turpshme.”
Datën 18 Dhjetor, lideri historik i PD tha se e ka caktuar Edi Rama për ta miratuar Kryesia falso.
“5 ditë pas dorëzimit të firmave pengkryetari i PD-së, mbledh Kryesinë falso, apo fake të kësaj partie e cila në masën 60% të saj është zgjedhur në dhunim flagrant të statutit të partisë. Pra jo me votën e fshehtë të Këshillit tonë Kombëtar. Por emëruar nga pengkryetari, siç donte ai. Njofton datën që i jep pengu u tij Edi Rama për Kuvend të PD-së, 18 dhjetorin,” tha Berisha duke garantuar mbajtjen e Kuvendit Kombëtar më 11 Dhjetor:
“Me këtë rast, unë dua të garantoj të gjithë firmëtarët e këtij misioni historik, firmat e të cilëve do të skaliten, do të gdhenden në muralin e pluralizmit politik, por dhe të PD-së se nuk do të ketë kurrë asnjë forcë dhe asgjë që mund të nëpërkëmb firmat e tyre. Kuvendi i PD-së do të mblidhet datën e shpallur prej tyre dhe se ai Kuvend do të mblidhet jo sipas rendit të ditës së pengkryetarit, por sipas rendit të ditës që ata guximtarë kanë firmosur në formularin e tyre,” tha lideri historik i PD, Sali Berisha, duke përfunduar:
“Të harrojë kush se mund të luaj me revolucionin paqësor që po zhvillohet në Shqipëri.”
