Sali Berisha: Viti 2023, vit i fitores së demokratëve!

Duke siguruar anëtarët e Partisë Demokratike dhe jo vetëm, se viti 2023 do jetë viti i fitores së demokratëve, i fitores së shqiptarëve, viti i triumfit të vlerave në këtë vend dhe i fundit të këtij regjimi që bazohet në vjedhjen, krimin dhe drogën, Kryetari i Partisë Demokratike, Sali Berisha, përkundër informacioneve se kanë filluar manipulimet masive për zgjedhjet e 14 Majit, siguron shqiptarët se opozita nuk do tolerojë dhe nuk do njoh kurrë një proces zgjedhor të bazuar mbi votën e vjedhur, si dhe do i përgjigjet Edi Ramës me të gjitha format që meriton për të mbrojtur pluralizmin, votën dhe demokracinë.

“Dua t’u garantoj ju dhe të gjithë shqiptarët, se qëllimi më i madh i kësaj përpjekje që bëjmë sot, është të shndërrojmë Shqipërinë në një vend të jetueshëm, në një vend të besueshëm nga shqiptarët. Në një vend që u ofron qytetarëve të saj potenciale shumë të mëdha.

Me këto potenciale, me rregulla të ndershme, ata mund të ndërtojnë në Shqipëri, të sotmen dhe të ardhmen.

Në këtë kontekst, nuk ka asnjë qëllim tjetër më të madh për PD-në, se ndalimi i kësaj hemorragjie të tmerrshme, këtij spastrimi etnik që po ndodh si në asnjë vend tjetër.

Nuk ka tregues më të dhimbshëm se ky për këtë vend të vogël. Ky vend i vogël ka përzënë 744 mijë shqiptarë vetëm në hapësirën evropiane. Ky vend i vogël ka përzënë mbi 31 përqind të popullatës gjatë shtatë viteve të qeverisjes së Edi Ramës.

Kurrë nuk ka pasur një hemorragji kaq të madhe kombëtare sa në këto vite.

Ky ndalim është një nga qëllimet absolute më madhore.

Unë jam optimist për këtë. Ka një grafikë që e kam nxjerrë disa herë. Ky grafik fakton se në vitet 2007, 2014, numri i popullsisë erdhi duke u rritur në mënyrë progresive, jo duke rënë. Jam i bindur se me atë eksperiencë dhe me një vizion të ri, për t’u përballur fuqishëm me këtë plagë të rëndë, do ia dalim përsëri ta shndërrojmë Shqipërinë në një vend ku popullata rritet,” tha Sali Berisha në komunikimi përmes rrjetit social Facebook në këtë fundjavë, duke u shprehur qartë se protestat e fuqishme do jenë një drejtim themelor me të cilin ne synojmë të dridhim themelet e këtij regjimi.

“Ne jetojmë sot në kushtet e një monizmi të plotë. Ku një njeri, në traditën më të zezë të etërve të tij, në një etje të pashuar për pushtet dhe pasuri, ka vënë nën kontroll të gjitha pushtetet.

Edi Rama sot, kontrollon 10 përqind më shumë pushtet se Ramiz Alia në vitin 1991.

Edi Rama, për të dhënë një goditje përfundimtare të pluralizmit politike, përpiqet në mënyrën më antikushtetuese, të pengojë PD-në për të hyrë në zgjedhjet e 14 majit, duke mbajtur peng vendimin e gjykatës, me të cilin normalisht asnjë kryeministër, në asnjë vend, nuk ka asnjë lidhje.”

“Të dashur miqtë e mi, me datën 25 mars, gjykata e Tiranës mori në shqyrtim dosjen e Kuvendit të 11 dhjetorit, të rithemelimit të PD-së.

Ajo gjeti gjithçka në përputhje me ligjet e vendit. Që në këtë vendim, të nesërmen e zbardhjes së tij, në mënyrë automatike, ky vendim regjistrohet në regjistrin e partive politike. Në çdo vend të lirë, kur një grup njerëzish vendosin të krijojnë një shoqatë apo parti, hartojnë statutin, firmosin dokumentin dhe gjykata vlerëson përputhjen e tyre me ligjin.

Ky vendim dhe asnjë element tjetër, realizon automatikisht regjistrimin ne regjistrin e partive dhe shoqatave. Kur partitë ndryshojnë statutin, programin, këto ndryshime ato janë të detyruara t’i dërgojnë në gjykatë. Këtë bëri PD, dhe gjykata pasi i vlerësoi, i gjeti ligjore.

Pra, kemi marrjen peng të vendimit të gjykatës, nga data 25 mars, gjer sot. Me qëllimin e vetëm të pengojë pjesëmarrjen e PD në zgjedhje. Ose të detyrojë PD-në të veprojë siç veproi para vendimit të gjykatës. Ne krijuam një koalicion dhe morëm një emër tjetër në koalicion. Por nuk kishim vendimin e gjykatës,” tha Kryetari i Partisë Demokratike i prerë se pas vendimit të gjykatës, PD nuk ka më asnjë pengesë, përveç urrejtjes së Edi Ramës, qëndrimit të tij antikushtetues për ti penguar.

“Në këtë kontekst, ne nuk do pengohemi. Ne jemi forca kryesore politike e vendit. Ai kërkon të hakmerret ndaj PD, për pushtetin e etërve të tij.

Unë dua t’u rikujtoj se me 11 dhjetor 1991, u mblodh plenumi i partisë për të shqyrtuar ultimatumin e studentëve. Në atë mbledhje, një njeri më shumë se kushdo tjetër, ka kërkuar përdorimin e armëve, futjen e tankeve ndaj studentëve, dhe ky është dajo i Ramës, Spiro Koleka.

Kjo ishte urrejtja familjare patologjike ndaj pluralizmit në këtë familje bllokmenësh.

Në këtë kontekst, ju garantoj se ai do pësojë fatin e etërve të tij dhe demokratët nuk mposhten kurrë.
Demokratët janë forca politike që udhëhoqi revolucionin demokratik të viteve ’90, përmbysin sistemin komunist, hodhi themelet e tregut në Shqipëri, realizoi demokraci funksionale të certifikuar nga ndërkombëtarët, anëtarësuan Shqipërinë në NATO, firmosën MSA, anëtarësuan Shqipërinë në Këshillin e Europës, hoqën vizat dhe morën rekomandimin e BE për statusin kandidat,” tha Berisha dhe mbi të gjitha, bënë avokatinë e çështjes kombëtare, e vërteta është se pavarësia e Kosovës u shpall në Tiranë nga presidenti Bush në vizitën e tij historike.

“Demokratët bënë gabime, por i korrigjuan ata. Ata ia dolën që qytetarët shqiptarë të kenë rrogat më të larta në rajon, edhe se bullgarët dhe rumunët. Kjo trashëgimi fton çdo demokrat të qëndrojë fuqishëm. Protestat e fuqishme do jenë një drejtim themelor me të cilin ne synojmë të dridhim themelet e këtij regjimi të bazuar mbi krimin, vjedhjen dhe drogën.”

Duke ju kthyer aktualitetit, lideri i opozitës iu përgjigjë demokratëve të interesuar për zgjedhjet e 14 Majit, për të cilat ai thotë se manipulimi masiv ka filluar, por Partia Demokratike nuk do ta njoh kurrë një proces zgjedhor të bazuar mbi votën e vjedhur

“Manipulimi i zgjedheve ka filluar masivisht dhe ne po e ndjekim me intensitet. Por ne qëndrojmë në vendimin tonë. Në mënyrë absolute do jetë përgjegjës dhe demokratë nuk do tolerojnë kurrë, nuk do njohin kurrë një proces zgjedhor të bazuar mbi votën e vjedhur.

Shqiptarët duhet ta dinë se Edi Rama nuk ikën me votë. Se ky sot në këtë moment që flasim, narkoshtetin e tij e ka shndërruar në një makineri gjigante elektorale, që përdor tonelatat e narko-eurove, përdor makinerinë shtetërore, përdor gjithçka për të dhunuar votën e shqiptarëve,” tha Berisha duke përsëritur se përgjigjia është vetëm një: Vetëm revolucion.

“Unë mendoj se në interesin më të mirë tuajin, në interesin më të mirë të PD dhe Shqipërisë, bashkimi duhet të ketë si rrugë të vetme, lirinë dhe vetëm lirinë. Ç’nënkupton bashkimi ynë si njerëz të lirë?

Së pari, nënkupton që ne, brenda nesh, duhet të respektojmë votën e lirë. Ne në Shqipëri sollëm dy gjëra, votën e lirë dhe pluralizmin kur u themeluam.

Dhe unë ju garantoj se gjatë këtyre muajve të fundit, kjo forcë politike ka votuar me votën e saj të lirë me shumë se të gjithë forcat e tjera në 30 vite.

Primaret ishin një autostradë e hapur për të gjithë demokratët. Shumë prej tyre përfituan.

Sot në disa qarqe apo rrethe, janë kandidatë të PD-së, ish-drejtues apo individë të cilët nuk u rreshtuan në fillim me foltoren. Por kuptuan se rruga e bashkimit është rruga e lirisë.

Morën guximin, kandiduan dhe u votuan dhe sot janë kandidatë.

Së dyti, bashkimi i PD kalon duke pranuar mendimin ndryshimin. Po ju rikujtoj se statuti i 11 dhjetorit ka nenin e fraksionit. Çfarë do të thotë? Do të thotë që ata anëtarë, ata drejtues, ata deputetë, të cilët kanë mendime të ndryshme nga kryetari dhe kryesia aktuale, ata mund të krijojnë fraksionin e tyre. Dhe nga ai pozicion, të mbrojnë interesat e demokratëve që u besojnë. Pra, ne jemi parti e mendimit ndryshe,” tha kryedemokrati duke përfunduar:

“Çfarë tregojnë zhvillimet e kësaj force politike? Zhvillimet treguan se udhëheqja e saj ishte marrë peng. Bënte biznes me Edi Ramën. Se Lulzim Basha ishte marrë peng. Se Alibasha është peng. Ju garantoj se pengjet nuk ka forcë në botë që t’i çpengojë.

Ndaj duhet të dallojmë demokratët nga pengjet. Të tjerë tek-tuk ndjekin tenderat dhe të fituarit në mënyrë të pandershme.

Ata nuk mbrojnë interesat tuaja, nuk mbrojnë interesat e demokratëve.

Pra, kemi të bëjmë me persona të caktuar, të cilët kanë faktuar në mënyrë të përsëritur se janë në vasalitet dhe keqpërdorim nga Edi Rama. A nuk doli Alibasha dhe u tha demokratëve se është rënë dakord që presidentin na e lanë ne? A u tall dynjaja me demokratët? Mund të jap shembuj të tjerë plot.

Edhe njëherë, çdo demokrat që mendon ndryshe, nëse janë vërtet në pozicione se kanë kundërshtime me Sali Berishën apo kryesinë, të krijojnë fraksionin e tyre. Por qëndrimi larg zgjedhësve, qëndrimi larg anëtarëve, i dëmton çdo ditë që kalon.”

Edhe në këtë komunikim përmes rrjetit social, Kryetari i Partisë Demkratike, garantoi demokratët se opozita është përgatitur për t’u përballur me këtë regjim dhe se përpjekja e Edi Ramës për të qëndruar me dhunë në pushtet, do dështojë:

“Opozita nuk ka fjalë dhe premtime pa fund. Opozita ka veprime. Po të ndjekësh procedurat, ato janë veprime për herë të parë në Shqipëri.

Opozita ka organizuar edhe protesta që kanë rezonuar në Shqipëri dhe mbarë Europën.

Por opozita e ka deklaruar se ky regjim nuk lejon votën e shqiptarëve.

Në këtë kontekst, opozita është përgatitur për t’u përballur me këtë regjim.

Kjo është një betejë për jetë a vdekje, për pluralizmin, për votën, për të gjitha.

Unë kam bindjen se shqiptarët nuk do e pranojnë kurrë këtë gjë. Do i përgjigjen Edi Ramës me të cilat format që meriton për të mbrojtur pluralizmin, votën dhe demokracinë,” tha Kryetari i Partisë Demkratike, Sali Berisha, duke siguruar ndjekësit e tij në rrjetet sociale, anëtarësinë e PD dhe gjithë qytetarët e Shqipërisë se viti 2023 do jetë viti i fitores së demokratëve.

“Viti 2023 do jetë viti i fitores së demokratëve, i fitores së shqiptarëve, viti i triumfit të vlerave në këtë vend dhe i fundit të këtij regjimi që bazohet në vjedhjen, krimin dhe drogën.

Ju e shihni se në çfarë situate e kanë katandisur vendin. Urrejtja popullore ndaj tyre është e pakufishme.
Përpjekja për të qëndruar me dhunë në pushtet, do dështojë. Unë kam bindjen më të madhe se flladi i lirisë, revolucioni demokratik, do përmbysë, do të arkivojë këtë regjim, që i kushtoi shqiptarëve pothuajse sa një diktaturë në disa aspekte.”