Samit i NATO-s, Presidentja e Kosovës drejt Washingtonit

Me ftesë të Sekretarit të Shtetit të SHBA-së, Antony Blinken, Presidentja e Kosovës, Vjosa Osmani,ka udhëtuar drejt Washingtonit ku do të marrë pjesë në aktivitetin e organizuar nga Departamenti Amerikan i Shtetit për Gratë, Paqen dhe Sigurinë, i cili mbahet në kuadër të Samitit të NATO-s, në 75-vjetorin e themelimit të Aleancës.

“Përfshirja e Kosovës në aktivitetin e organizuar nga Sekretari Blinken dedikuar Agjendës për Gratë, Paqen dhe Sigurinë është tregues i fuqishëm i rolit në rritje që po luan Kosova në avancimin e kësaj agjende në nivel global dhe përkushtimit të saj ndaj parimeve dhe vlerave të mbështetura nga NATO-ja,” thekson Presidenca e Kosovës përmes një njoftimi.

Gjatë qëndrimit në Washington, Presidentja Osmani do të zhvillojë dhe takime të tjera ku do të diskutohet forcimi i bashkëpunimit me qëllim të kontributit për paqe dhe siguri në Ballkan e më gjerë.

Zyra e Presidentes së Kosovës është përzgjedhur në mesin e tre partnerëve globalë nga Zyra e Sekretarit Blinken për ta themeluar Qendrën Rajonale të Ekselencës për Gratë, Paqen dhe Sigurinë. Marrëveshja për themelimin e kësaj Qendre është nënshkruar nga Presidentja Osmani dhe Zyra e Sekretarit Blinken në prill të këtij viti gjatë Forumit për Gratë, Paqen dhe Sigurinë.

Ndryshe, Samiti i NATO-s në Washington D. C. shërben si një platformë për shtetet anëtare dhe shtetet partnere që të bashkëpunojnë për çështjet të sigurisë globale dhe ta riafirmojnë përkushtimin e tyre për një të ardhme më të sigurt.