Samiti BE-Ballkani Perëndimor, konfirmohet heqja e 50% të masave ndëshkuese për Kosovën

Në ditën e Samitit BE-Ballkani Evropian kur dhe u miratuan konkluzionet e Bashkimit Evropian për Zgjerim, Komisioni Evropian ka konfirmuar se do të lejojë 50 për qind të asistencës financiare për Kosovën në kuadër të procesit të heqjes së masave ndëshkuese.

Ndërkohë Presidentja e Kosovës, Vjosa Osmani, si pjesëmarrëse në Samitin BE-Ballkani Perëndimor që po zhvillohet në Bruksel, ndërsa mirëpriti vendimin për heqjen e pjesshme të masave, pas takimit me Presidentin e Këshillit të Bashkimit Evropian, António Costa, tha se Kosova shpreson dhe punon që sa më parë, ato të hiqen në tërësi.

“Mirëpresim vendimin e BE-së për heqjen e pjesshme të masave, përderisa shpresojmë e punojmë që, sa më parë, ato të hiqen në tërësi. Republika e Kosovës ka dëshmuar konstruktivitet, bashkëpunim e përputhshmëri të plotë me politikën e jashtme e të sigurisë të Bashkimit Evropian,” tha Presidentja e Kosovës pas takimit me Presidentit e Këshillit Evropian e bindur se nuk ka nuk ka asnjë arsye që të pengohet e shtyhet heqja e masave të tjera të mbetura ndërsa përfundoi:

“Në takim potencova se Kosova ka përmbushur të gjitha kushtet e përcaktuara nga vetë BE, sado që ato ishin të padrejta, prandaj nuk ka asnjë arsye që të pengohet e shtyhet heqja e masave të tjera të mbetura. Në anën tjetër, shpresojmë që sa më parë, të kemi përkrahjen e të gjitha shteteve anëtare që edhe Kosova, bazuar në merita, të marrë statusin e kandidatit për anëtarësim në Bashkimin Evropian.”

Ministrat e BE-së përmes konkluzave të presidencës daneze të BE-së kanë përshëndetur heqjen e masave të mbetura, por shpejtësia dhe modaliteti i heqjes së tyre tash varen nga Komisioni Evropian. 

“Pas transferit të rregullt dhe të qetë të pushtetit lokal në dhjetor 2025 pas zgjedhjeve të fundit lokale, ne do të lëshojmë tutje përafërsisht 50 për qind të asistencës financiare në shumë prej rreth 216 milionë eurosh,“ tha një zëdhënës i Komisionit Evropian duke shtuar:

“Kjo do të mundësojë nënshkrimin e 4 projekteve që së bashku përbëjnë 34,6 milionë euro të kontributeve të BE-së, dhe të nisë implementimi. Po ashtu për të përmbyllur programimin e mbetur të fondeve IPA III që janë dedikuar Kosovës.“

Nga kjo, 181 milionë pritet të planifikohen për miratim nga Komisioni Evropian si vendim për financim në pranverë të vitit 2026, që do të mundësonte projektet e para të nisin në pjesën e dytë të vitit 2026.