Samiti i BE, Biden mbështet fuqishëm integrimin e Ballkanit Perëndimor
Presidenti i Shteteve të Bashkuara, Joe Biden, ka shprehur mbështetje të fuqishme për integrimin e vendeve të Ballkanit Perëndimor në Bashkimin Evropian.
Shtëpia e Bardhë përmes një njoftimi tha se Biden shprehu mbështetjen e tij të fortë për vazhdimin e pranimit në Bashkimin Evropian të vendeve të Ballkanit Perëndimor, në një bisedë përmes telefonit me presidenten e Komisionit Evropian, Ursula von der Leyen
Të dy udhëheqësit, raporton RFE, kanë diskutuar edhe për bashkëpunimin SHBA-BE, pandeminë e COVID-19 si dhe kanë adresuar çështjen e marrjes së hapave për të adresuar krizën klimatike.
Mbështetja e presidentit Biden vjen një ditë para se liderët e Bashkimit Evropian, BE, dhe kolegët e tyre nga vendet e Ballkanit Perëndimor të mbajnë Samitin e tyre në Bërdo afër Kranjit në Slloveni.
Sipas burimeve diplomatike në Bruksel, të gjitha 27 vendet anëtare të BE-së janë pajtuar me tekstin e draftit të deklaratës që do të miratohet në këtë samit. Në të thuhet se liderët e BE-së përshëndesin përkushtimin e partnerëve nga Ballkani Perëndimor ndaj perspektivës evropiane, që sipas këtij dokumenti, “është në interes strategjik dhe mbetet një zgjedhje e përbashkët strategjike”.
Sikur edhe në deklaratat e mëhershme nga samitet e tilla edhe kësaj radhe do të përsëriten thirrjet për respektimin e parimeve të demokracisë, sundimit të ligjit, lirisë së mediave, shoqërisë civile, luftës kundër korrupsionit dhe krimit të organizuar, të drejtat e pakicave dhe kritereve tjera të cilat janë parime themelore të BE-së.
Presidentja e Komisionit Evropian, Ursula von der Leyen, raporton RFE, javën e kaluar zhvilloi një turne në vendet e Ballkanit Perëndimor. Ajo shprehu mbështetje për integrimin e këtyre vendeve në BE.
Ndryshe, krerët e shteteve dhe të qeverive të BE-së sot me fillim në orën 19:00 në një darkë jo formale do të diskutojnë në Brdo të Sllovenisë marrëdhëniet me SHBA dhe perspektivën e antarësimit të vendeve të Ballkanit. Në Samitin në Slloveni ku do të jetë dhe kancelarja e Gjermanisë Angela Merkel, krerët e vendeve të BE-së do të konsultohen me krerët e shteteve dhe të qeverive të vendeve të Ballkanit Perëndimor, Shqipërisë, Maqedonisë së Veriut, Serbisë, Kosovës, Bosnje-Hercegovinës dhe Malit të Zi, për mundësinë e zgjerimit të BE-së.
