Samiti i BE, Albin Kurti: Ballkani i Hapur s’është evropian, BE e mjaftueshme për Ballkanin!
Pas Samitit të BE në Shkup, Kryeministri Albin Kurti tha nuk është i lehtë procesi i normalizimit të marrëdhënieve me Serbinë, duke pasur parasysh që shteti fqinj nuk ka vullnet për këtë ndërsa e bëri të qartë se Kosova nuk do ti tërheq masat e sigurisë ndaj Serbisë, përderisa ka grupe paramilitare
“Duhet të ndahet procesi i anëtarësimit të Kosovës në BE me procesin e normalizimit. Nuk është e lehtë t’i normalizojmë raportet me dikë sepse dihet se Serbia nuk ka as vullnet as për këtë e as Perëndimin,” tha Albin Kurti duke shtuar se masat ndaj Serbisë nuk janë tregtare por janë masa të sigurisë.
“Ne nuk kemi masa tregtare ndaj Serbisë, kemi masa të sigurisë. Në vitin 2023 tri herë kemi pasur sekuestrime në veri të Kosovës,” tha Kryeministri i Kosovës i prerë se nuk do të ndodh heqja e masave të sigurisë përderisa ka grupe paramilitare.
“I gjithë ky armatim është prodhuar ne Serbi dhe ka ardhur nga Serbia. Për shkak të kontrollave të shtuara, ka mundësi që ndërmarrjet e caktuara nuk janë të interesuara të kalojnë kufirin në Kosovë sikurse dikur. Masat e sigurisë nuk jemi të gatshëm t’i tërheqim derisa kemi grupe paramilitare,” tha Kurti ndërsa foli dhe për ndërlidhjen mes Samitit në Shkup dhe idesë së Ballkanit të Hapur.
“Kjo nuk ka të bëjë me ‘Ballkanin e hapur’ sepse është BE. ‘Ballkani i hapur’ nuk është mjaftueshëm evropian ndërsa Evropa e hapur është e mjaftueshme për Ballkanin. ‘Ballkani i Hapur’ nuk i ka rregullat dhe financimin e BE-së.”
Plani i Bashkimit Evropian për rritjen ekonomike synon përfitimin nga tregu i lirë para anëtarësimit në BE, tha Kryeministri Albin Kurti, ndërsa kishte dhe një shpjegim pse nuk u mbajtë konferenca e përbashkët për media e liderëve të Ballkanit.
“Plani i rritjes synon të na ofrojë për të përfituar nga tregu unik para anëtarësimit. Plani e rrit shpejtësinë e reformave dhe konvergjencës mes Kosovës dhe BE-së,” tha Kurti duke saktësuar se Plani i rritjes mund të shtojë 10 për qind vlerën e produktit bruto.
“Me nivelin aktual të rritjes ekonomike, produkti bruto qëndron ndërmjet 30 për qind dhe 50 për qind të mesatares së BE-së. Plani i rritjes së BE-së mund ta shtojë edhe 10 përqind.”
Në fund, pasi konferenca e përbashkët ndryshoi me daljen e çdo Kryeministri veç e veç, ai tha se organizatorët duhet të përgjigjen.
“Nuk jam ne dijeni pse nuk ishte e përbashkët. Me të përfunduar takimi u njoftuam që secili burrështetas do të paraqiste para gazetarëve të veçantë. Do te duhej organizatorët të tregonin.”
