Samiti i BE, Reuters: Maqedonia e Veriut drejt hapjes së negociatave, Shqipëria jo!

Maqedonia e Veriut ka gjasa të fitojë mbështetjen e Bashkimit Evropian për të nisur bisedimet për anëtarësim gjatë këtij viti, ndërsa Shqipëria jo, sepse vazhdon të përballet me kundërshtimin e Francës, Gjermanisë dhe Holandës. Kështu raporton Agjencia e lajmeve Reuters duke shtuar se pavarësisht nga retorika e BE-së se blloku duhet të pranojë anëtarë të rinj nga Ballkani Perëndimor për të çimentuar rrugën e tyre evropiane dhe për të kompensuar ndikimin kinez dhe rus, ndjenja anti-imigracioni ka ngritur dyshime në disa shtete të BE-së veriore.

Të mbështetur nga një numër qeverish të vendeve të Bashkimit Evropian dhe nga Komisioni Evropian, Shqipëria dhe Maqedonia e Veriut kishin shpresuar që ministrat për Europën të bllokut do t’iu hapnin rrugën bisedimeve gjatë një takimi javën tjetër në Luksemburg. Kjo do t’i hapte rrugën për aprovim nga liderët e BE-së në Samitin e Brukselit më 20-21 qershor.

Por asnjërit vend nuk do t’i jepet dritë jeshile në atë kohë, theksuan diplomatët dhe zyrtarët e BE për Agjencinë e lajmeve Reuters, edhe pse 13 vende të BE, duke përfshirë Italinë dhe Poloninë, Presidenti i Këshillit Europian Donald Tusk dhe Komisioni kanë bërë publike thirrjet për fillimin e negociatave zyrtare.

Tani, marrëveshja e fundit është të arrihet një pakt midis qeverive të BE në shtator, por vetëm për Maqedoninë e Veriut, e cila gjithashtu është e vendosur të bashkohet me NATO-n në vitin 2020.

“Maqedonia e Veriut ka një shans të mirë për bisedimet e anëtarësimit në BE, duke pasur parasysh zgjidhjen historike të çështjes së emrit të saj”, tha një zyrtar i lartë i BE duke iu referuar mosmarrëveshjes së vjetër me Greqinë, që bllokoi rrugën e saj drejt BE dhe aleancës së NATO-s .

Ndryshimi i emrit nga Ish Republika Jugosllave e Maqedonisë në Republikën e Maqedonisë Veriore ka gjasa të bindë Parisin, Berlinin dhe Hagën për të mbështetur bisedimet e BE.

“Por Shqipëria është ende një çështje e madhe për disa qeveri. Nuk është aspak premtuese,” tha zyrtari emrin e të cilit Agjencia e lajmeve reuters nuk e bënë publik.

Perceptuar si një nga vendet më të korruptuara të Europës, sipas Transparency International, Shqipëria, e cila tashmë është anëtare e NATO-s, ka bërë përparim të kufizuar vetëm në luftën kundër pastrimit të parave, thonë zyrtarët e BE dhe SHBA, pavarësisht nga shkarkimi qe u eshte bere gjykatësve dhe prokurorëve të korruptuar.

Katër vende të tjera të Ballkanit Perëndimor, Bosnja, Kosova, Serbia dhe Mali i Zi po kërkojnë gjithashtu anëtarësimin në BE.

NDALOHET HYRJA?
Në qershor të vitit 2018, Franca dhe Holanda bllokuan papritur fillimin e bisedimeve të BE-së për Shqipërinë dhe Maqedoninë e Veriut, duke kërkuar më shumë reforma. Diplomatët thanë se masa reflektoi shqetësimet rreth ndikimit në votuesit në zgjedhjet e BE në maj 2019.

Me zgjedhjet e Parlamentit Europian nga rruga, Franca dhe Hollanda pritej të binin në vijë, ndërsa selia e BE ftoi në Bruksel Kryeministrin e Shqipërisë Edi Rama dhe Presidentin e Maqedonisë Veriore Stevo Pendarovski.

Në një vizitë në Bruksel më parë këtë muaj, Sokol Dedja tha se ishte koha për bllokun të ndalonte përdorimin e nevojës për reforma përgatitore “si një mënyrë për t’i mbajtur vendet jashtë Bashkimit Evropian”.

Bisedimet e anëtarësimit në BE, të cilat zakonisht zgjasin deri në një dekadë, janë një proces de facto reformash për t’i sjellë kombet deri në nivelet e BE.

Pavarësisht fitoreve te se djathtes ekstreme në Itali, Poloni dhe Hungari, ne zgjedhjete BE, bisedimet për anëtarësimin e ardhshëm për Shqipërinë dhe Maqedoninë e Veriut nuk duket se luajnë në duart e atyre që premtojnë të ndalojnë emigracionin. Partitë franceze dhe holandeze të ekstremit të djathtë kanë humbur vendet në krahasim me ato qe kishin  në 2014.

Megjithatë, më 11 qershor, parlamenti holandez miratoi një mocion kundër hapjes së bisedimeve me Shqipërinë, edhe pse nuk pati një lëvizje te ngjashme për Maqedoninë e Veriut.

Qeveria gjermane kërkon një dritë jeshile për Maqedoninë, por nuk ka asnjë marrëveshje për Shqipërinë, të cilën qendra e djathtë në koalicion e sheh si një shtet problematik. Dhoma e ulët e Bundestagut ka rënë dakord të shtyjë çdo vendim deri në shtator.