Samiti i BE, Thaçi: Kosova, e gatshme për statusin e vendit kandidat

Presidenti i Kosovës, Hashim Thaçi, duke folur në Samitin e Zagrebit, u ka kërkuar sërish sot vendeve të Bashkimit Evropian që të marrin vendim për liberalizimin e vizave për qytetarët e Kosovës, ndërkohë që ka theksuar se Kosova i ka përmbushur të gjitha kriteret për marrjen e statusit të vendit kandidat për t’u anëtarësuar në BE.

Në Samitin e Zagrebit mes vendeve të bllokut evropian dhe të atyre të Ballkanit Perëndimor që është mbajtur online, për shkak të situatës së krijuar me pandeminë e koronavirusit, temë diskutimi ka qenë perspektiva evropiane për rajonin dhe sfidat e krijuara pas shpërthimit të këtij virusi. Lidhur me perspektivën evropiane të Kosovës, raporton RFE, Thaçi është shprehur:

“Para 20 vitesh në Samitin e Zagrebit iu ofrua perspektiva evropiane Kosovës dhe Ballkanit. Është e dhimbshme që sot të dëgjojmë përkushtimin e njëjtë, por pa vendim për liberalizimin e vizave, e madje pa statusin e kandidatit për anëtarësim në BE, përkundër që i kemi përmbushur të gjitha kriteret.”

Ndryshe, procesi i liberalizimit të vizave ndërmjet Kosovës dhe Bashkimit Evropian ka filluar në vitin 2012 , por ende nuk është finalizuar.