Samiti i BERZH në Londër, Kurti dhe Bërnabiç për taksën dhe reciprocitetin

Në Samitin e Bankës Europiane për Rindërtim dhe Zhvillim, BERZH në Londër mbi investimet 2020 në Ballkanin Perëndimor, ku në një panel ishin kryeministrat e Ballkanit, i pashmangshëm ishte diskutimi për taksën për produktet serbe.

Zv/Presidenti i BERZH, Jurgen Rigteri, duke hedhur dritë mbi dy qëndrimet përkatëse përmes rrjetit social Twitter, thekson se Kryeministri Albin Kurti, ka kërkuar reciprocitet dhe njohjen e Pavarësisë së Kosovës nga Serbia, ndërsa kryeministrja serbe, Ana Bërnabiç, është shprehur se përmirësimi i tregtisë rajonale është thelbësor për sigurinë në rajon.

Ndërkohë Agjencia shtetërore serbe e lajmeve Tanjug ka dhënë dhe ca detaje pikërisht për taksën 100 për qind për mallrat nga Serbia dhe Bosnja.

“Fatkeqësisht, ne kemi tarifa 100 përqind të vendosura nga Prishtina për mallrat nga Serbia qendrore dhe Bosnja dhe Hercegovina. Shpresoj që Albin Kurti do ta shqyrtojëë përsëri, sepse duhet të mendojmë se si të lehtësojmë tregtinë midis nesh dhe si të krijojmë një mjedis të favorshëm biznesi,” është shprehur, sipas Tanjug, Ana Bërnabiç.

Ndërkohë Kryeministri Albin Kurti foli dh epër investimet e diasporës në Kosovë.

“Ne kemi diasporë të madhe dhe investimet prej tyre do ta ndihmojnë Kosovën jashtëzakonisht,” tha Albin Kurti në Samitin e BERZH-it.

Ndryshe, ky Samit pritet të nxjerrë në pah mundësitë për investime në Ballkanin Perëndimor dhe të promovojë projektet rajonale. Aktualisht BERZH në rajonin e Ballkanit Perëndimor ka investuar mbi 12 miliardë euro.