Samiti i G20, AP: Lavrov u shtrua në spital! Moska: Kulmi i falsifikimit!

Ministria e Jashtme e Rusisë i mohoi raportet se drejtuesi i saj, Sergei Lavrov, është shtruar në spital.

Agjencia e lajmeve Associated Press, AP, raportoi se Lavrov është dërguar në spital pas mbërritjes në Bali të Indonezisë, ku do të merrte pjesë në samitin e vendeve më të industrializuara, G20.

Associated Press tha se lajmi është konfirmuar nga tre zyrtarë të Qeverisë indoneziane dhe disa mjekë. Ata nuk pranuan të identifikohen, pasi nuk ishin të autorizuar për të folur publikisht për çështjen, tha AP.

Dy prej burimeve thanë se Lavrov po trajtohej për probleme në zemër.

Zyrtarët në Ambasadën e Rusisë në Bali nuk iu përgjigjën kërkesave për të sqaruar situatën ndërsa Zëdhënësja e Ministrisë së Jashtme të Rusisë, Maria Zakharova, i cilësoi raportet si kulmi i falsifikimit.

“Kjo, natyrisht është, kulmi i falsifikimit,”citon fjalët e zëdhënëses Zakharova, Agjencia e lajmeve Reuters.

Sipas raporteve të Agjencisë së lajmeve Reuters, Guvernatori i Balit tha se Lavrov është në gjendje të mirë shëndetësore dhe se ishte në spital për një kontroll.

Ndërsa Agjencia rus e e lajmeve TASS shkoi një hap tutje duke publikuar një foto të Sergei Lavrovit të buzqeshur pranë një pishine në Bali.

Ndryshe, historitë e Sergei Lavrovit në Samitin e G20 në Indonezi kur mungon shefi i tij Vladimir Putin nuk kanë mbaruar. Nga organizatori është kërkuar që ai të mos marrë pjesë në fotografinë e përbashkët të pjesëmarrësve të samitit, dhe presidenti indonezian, Joko Widodo, vetëm në minutën e fundit u çlirua nga sikleti pasi refuzoi këtë ide; Në minutën e fundit, organizatorët u kujtuan që në fotograinë e përbashkët të përfshihen vetëm shefat e shteteve dhe qeverive, duke shmangur në këtë mënyrë pjesëmarrjen e Lavrovit në foton ku do jetë dhe presidenti ukrainas Zelensky.