Samiti i Komunitetit Politikë, Osmani: Fillimisht sanksionet kundër Serbisë, pastaj dialogu!
Fillimisht duhet të vihen sanksione kundër Serbisë dhe pastaj dialogu! Kështu u shprehë e prerë Presidentja e Kosovës, Vjosa Osmani, pasi nuk sheh arsye për t’u takuar para se të vendosen sanksione kundër Vuçiçit ndërsa mbylli një herë e mirë spekulimet mbi takimin e mundshëm me Presidentin e Serbisë në kuadër të Samitit të Tretë të Komunitetit Politikë Evropian që po zhvillohet në Granadë.
Në prag të Samitit të Komunitetit Politikë Evropian ku marrin pjesë liderët e 47 vendeve evropiane, Presidentja Vjosa Osmani tha se do të kërkojë që Serbia të sanksionohet për agresionin e kryer në Kosovë, më 24 shtator nga grupet terroriste.
“Duhet ta kuptojmë që Serbia kreu krim. Ata e kanë rrezikuar tërë kontinentin evropian. Ajo që ka ndodhur më 24 shtator është kryer me urdhrin e lidershipit të Serbisë,” tha Presidentja e Kosovës duke shtuar se mënyra e vetme për ta tejkaluar situatën aktuale është që të imponohen masat e ashpra kundër Serbisë.
“Nëse situata vazhdon siç është tani atëherë duhet të flasim për çështje teknike dhe të harrojmë faktin se ka pasur një akt agresioni nga Serbia të realizuar nga grupet terroriste që janë armatosur nga udhëheqja e Serbisë.
Kjo duhet të ndalohet që Vuçiç të mos kryejë akte të tilla. Deklaratat nuk mjaftojnë, duhet të ndërmerren masa, duhet të jemi unanim në mbështetjen e Kosovës sa i përket kërcënimeve nga Serbia,” tha Presidentja e Kosovës, Vjosa Osmani duke përfunduar:
“Serbia nuk duhet të marrë pjesë në Komunitetin Politikë Evropian, pasi kjo është një tavolinë e vendeve që besojnë në paqe e që fatkeqësisht Serbia nuk është njëra prej tyre.”
Ndryshe, tensionet e fundit mes Kosovës dhe Serbisë, dhe në mes të Armenisë dhe Azerbajxhanit, pritet të jenë sot në qendër të diskutimeve të 47 liderëve evropianë në mbledhjen e zgjeruar të Komunitetit Politik Evropian që po zhvillohet në Granadë të Spanjës, ku do shqyrtohet dhe përmirësimi i bashkëpunimit, pavarësisht përkeqësimit të konflikteve dhe tensioneve në kontinent.
