Samiti i Londrës, Kurti: Na nevojiten investime në transport, energji e infrastrukturë

Në Samitin e Investimeve në Ballkanin Perëndimor në Londër, Kryeministri Albin Kurti tha se Kosovën e njohin tre nga katër vendet fqinje dhe njihet si Republika e Kosovës e jo si u referua “Kosova e Metohija” ndërsa vazhdoi të flas pë ekonomi.

“Vendi im quhet Republika e Kosovë, jo si i është referuar këtu ‘Kosova e Metohija’. Po të shkoja në këtë rrugë do të merrja shumë kohë, pasi pos Serbia, do të duhej të thosha Serbia e Vojvodina, Sanxhaku, Toplica Rashka dhe Lugina e Preshevës. Më mirë të përqendrohemi në ekonomi,” tha Albin Kurti në panelinku ishte dhe Kryeministrja e Serbisë, Ana Brnabiç, që disa herë u lavdërua për zhvillimin ekonomik.

Kosova, në një vijë me SHBA-në dhe Britaninë e Madhe

Me këtë rast, Kryeministri Albin Kurti tha se Kosova është në një vijë me SHBA-në dhe Britaninë e Madhe, si në sferën politike, ashtu edhe në biznes, sidomos pas agresionit rus në Ukrainë.

“Jemi të dedikuar për rendin e ligjit dhe luftimin e korrupsionit në vijë me SHBA-në dhe Britaninë e Madhe, si në vlerat politike edhe në ato të biznesit sidomos pas agresionit rus në Ukrainë që tashmë së fundi ka mbushur dy vjet.” tha Albin Kurti duke shtuar se në këto tre vitet e fundit Kosova ka pasur një zhvillim ekonomik, përparim demokratik dhe stabilitet institucional, që ka qenë ndihmesë e madhe për të luftuar me sukses rreziqet për sigurinë, e po ashtu të bëhet adresimi në ndryshimet klimatike, si dhe pabarazinë sociale.

“Kosova udhëheq në Ballkanin Perëndimor sa i përket projektimeve në vitet 24-25. Kemi përparime në zbatimin e rendit dhe ligjit në avancimet në të drejtat politike, në të drejta civile, etj. Kjo e pozicionon Kosovën në një situatë ta favorshme në hartën globale dhe jemi në mes të Lindjes së Mesme, të Evropës dhe Afrikës.”

Kryeministri foli dhe për një fuqi punëtore që ka Kosova, ku mosha mesatare është 31 vjeçare dhe një ekonomi të tregut të hapur që krijon një ambient të mirë për biznesin.

“Jemi të vendosur në investimet teknologjike, ku nga 23 vende evropiane, Kosova del e 11 në ranglistë, duke lënë mbrapa të gjitha vendet kandidate për anëtarësim në BE. Në këto tre vite kemi dyfishuar eksportet dhe investimet  e huaja të drejtpërdrejta. Na duhen më shumë të tilla, megjithëse na duhen ma shumë investime të tilla.”

Duke folur për prioritetet rajonale ndërkufitare, Kryeministri i Kosovës tha se nevojiten investime si për transport, ashtu edhe për energji e infrastrukturë, ndërsa përmendi rreth 7 miliardë euro të ndara nga BE-ja që tashmë janë synuar.

“Kemi kryer ankandin për megawat solar në perëndim të Kosovës, gjashtë korporata po garojnë, kemi ofruar 15 vjet të kontratave me 75 euro për megawat në orë, do të hapim edhe një ankand tjetër nga mesi i këtij viti, në këtë rast j solar por me energji të erës.

Sa i përket transportit, pikë së pari me Shqipërinë jemi të dedikuar për një lidhje hekurudhore mes Prishtinës dhe Durrësit, të porteve të thata që promovojnë rritjen ekonomike, tregtinë dhe që është rajon më i lidhur dhe prosperues. Studimet e fizibilitetit tregojnë se linja më e mirë është ajo që lidh Gjakovën me Shkodrën, Prizreni duhet të lidhet me Tetovën, na nevojitet një tunel që duhet të hapet në të dyja vendet,” tha Kryeministri i Kosovës, Albin Kurti, duke përfunduar:

“Kjo do të mundësojë lëvizjen e lehtë ndërkufitare dhe fuqizimin e lidhjeve kulturore, tregtisë. Në partneritet me Malin e Zi fokusi është në ndërtimin e rrugëve të reja.”

Rama: Jemi një vend i mirë për të shtuar investimet serioze

Shqipëria tashmë ka ndryshuar shumë, tha Kryeministri i Shqipërisë, Edi Rama, i cilu bë pjesë e Samitit të Investimeve në Ballkanin Perëndimor në Londër, përmes një lidhje skype.

“Unë jam veteran i këtyre lloj formateve,sepse kam qenë i pranishëm qysh prej kur ka lindur ky format, para 10 vjetësh. Për 10 vjet kanë ndryshuar shumë gjëra, përveç sasisë dhe ngjyrës së flokëve të mi tani. Rajoni po shkon mirë dhe derisa bota po ashtu po ndryshon, Shqipëria ka ndryshuar shumë. Prej një vendi me stigmën e një vendi të pasigurt, në një vend i cili vitin e kaluar ka mbërri në një shifër prej 10 milionë turistësh, më shumë se trefishi i popullatës që kemi,” tha Edi Rama ndërsa foli për resurset e reja energjetike, duke theksuar se më parë sistemi energjetik i Shqipërisë ishte gati duke u shkatërruar, për shkak se, siç ka deklaruar ai, shumica e popullatës nuk paguante faturat.

“Borxhi publik i Shqipërisë shënoi rënie historike nën 60% në fund të vitit të kaluar, “pasi që kishte mbërritur majën, gati 80% për shkak të tërmetit tragjik, e po ashtu edhe pandemisë e cila erdhi menjëherë pas tërmetit,” tha Kryeministri Edi Rama ndërsa kishte një përgjigje të çuditshme në pyetjen pse investitorët duhet të investojnë në Shqipëri:

“Një përgjigje e thjeshtë është: Duhet sepse nëse nuk e bëjnë ata, dikush tjetër do ta bëjë.”

Ndryshe, Samiti i Investimeve në Ballkanin Perëndimor 2024 që mbahet sot në selinë e Bankës Europiane për Rindërtim e Zhvillim në Londër, ka për qëllim të nxjerrë në pah mundësitë e mundshme për investime dhe biznes në rajonin e Ballkanit Perëndimor dhe të promovojë projekte rajonale dhe ndërkufitare. Ky është samiti i gjashtë i BERZH-it i këtij lloji! Samiti inaugurues i Ballkanit Perëndimor u zhvillua në BERZH dhjetë vjet më parë, në shkurt 2014 dhe, për herë të parë, mblodhi së bashku të gjithë kryeministrat e rajonit.