Samiti i OSBE/ Ministrat e Ballkanit, Deklaratë për luftimin e korrupsionit

Gjatë Këshillit Ministror të OSBE-së, që po mbahet në Shkup, ministrat e Jashtëm nga Ballkani kanë nënshkruar sot një deklaratë të përbashkët për luftimin e korrupsionit në Evropën Juglindore përmes konfiskimit dhe digjitalizimit të aseteve.

“Përpjekjet bashkëpunuese janë thelbësore për të trajtuar në mënyrë efektive këtë sfidë komplekse. Duke pranuar se korrupsioni nuk njeh kufij, nënshkruesit zotohen të punojnë së bashku për të parandaluar, hetuar dhe ndjekur penalisht korrupsionin në të gjithë Evropën Juglindore. Vetëm përmes veprimeve kolektive mund të bëjmë përparim të rëndësishëm në çrrënjosjen e korrupsionit”, thuhet në deklaratën e miratuar.

Ministri i Punëve të Jashtme të Maqedonisë së Veriut, Bujar Osmani, tha se korrupsioni kërcënon sigurinë dhe mirëqenien ekonomike dhe se nënshkrimi i deklaratës nënkupton përkushtimin e tyre “në nivelin më të lartë të mundshëm”.

“Me nënshkrimin e deklaratës theksojmë vendosmërinë tonë dhe angazhimin e pakushtëzuar që të punojmë së bashku për të parandaluar korrupsionin në Evropën Juglindore. Kundër korrupsionit do të luftojmë me vendosmëri përmes hetimeve financiare dhe digjitalizimit”, tha Osmani.

Ministri i Punëve të Jashtme i Serbisë, Ivica Daçiç, e theksoi rëndësinë e bashkëpunimit ndërkombëtar që lufta kundër korrupsionit të jetë e mundur.

“Ne e quajmë veten kampion të korrupsionit, por nuk jemi. Aty ku ka para ka korrupsion. Marrja e provizionit në perëndim është e ligjshme, por këtu është korrupsion. Më vjen keq që ata nuk e nënshkruajnë këtë, ata duhet ta bëjnë të parë,” tha ministri serb duke akuzuar Perëndimin për korrupsion:

“Dyshoj se ne jemi më të korruptuar se ata. Dua vetëm që të mos na japin mësime nga anash!”

Ndërsa Ministri i Punëve të Jashtme të Bosnje Hercegovinës, Elmedin Konakoviç, shkoi një hap tutje:

“Korrupsioni është një realitet politik në Ballkan dhe për këtë arsye njerëzit po shpërngulen!”

Shefi i diplomacisë malazeze, Filip Ivanoviq, tha se OSBE-ja duhet të forcojë rolin e saj në luftën kundër korrupsionit dhe krimit, ndërsa homologu i tij nga Shqipëria, Igli Hasani, tha se kjo luftë duhet të jetë prioritet dhe mbetet vullnet politik për të bërë diçka më shumë në këtë fushë./RFE/