Samiti Procesit Berlinit, Scholz: Koha të tejkalohen konfliktet në Ballkan!
Liderët e Kosovës, Shqipërisë, Bosnje Hercegovinës, Malit të Zi, Maqedonisë së Veriut dhe Serbisë, nënshkruan sot në Berlin, në kuadër të Samitit të Procesit të Berlinit, tre marrëveshje për njohjen reciproke të letërnjoftimeve, të diplomave universitare dhe të kualifikimeve profesionale.
Në fjalën e hapjes së Samitit të Procesit të Berlinit, Kancelari gjerman, Olaf Scholz, kërkoi përshpejtimin e procesit të normalizimit të marrëdhënieve mes Kosovës dhe Serbisë, gjatë fjalimit të tij hapës në samitin e Procesit të Berlinit, i cili ka mbledhursot liderë të gjashtë vendeve të Ballkanit Perëndimor dhe ata të BE-së.
“Është koha të tejkalohen konfliktet në Ballkan që kanë vazhduar shumë gjatë, konflikte që ju ndajnë juve dhe i mbajnë vendet tuaja prapa në rrugën evropiane. Procesi i normalizimit mes Kosovës dhe Serbisë në veçanti duhet të përshpejtohet, kështu që ejani ta bëjmë këtë”, tha Scholz, si organizator i Samitit.
Olaf Scholz tha me këtë rast se Procesi i Berlinit synon edhe përshpejtimin e anëtarësimit të vendeve të Ballkanit Perëndimor në Bashkimin Evropian, duke thënë se realizimi i dëshirës së këtyre vendeve për të hyrë në BE është në interesin tonë.
“Sot jemi të bindur se procesi i Berlinit, jo vetëm që do të ndihmojë për shfrytëzimin e potencialit të plotë të bashkëpunimit rajonal, por do ta përshpejtojë anëtarësimin në BE të të gjitha vendeve të Ballkanit Perëndimor”, theksoi Scholz, duke shtuar se nënshkrimi i tri marrëveshjeve sot është një hap i rëndësishëm drejt këtij qëllimi.
Përveç bashkëpunimit rajonal, Scholz theksoi se “sfidat nga migrimi i parregullt, korrupsioni dhe krimi i organizuar janë çështje kyçe për të gjithë ne”, ndërsa shtoi se vendet ballkanike duhet t’i harmonizojnë politikat e vizave me BE-në.
Presidentja e Komisionit Evropian, Ursula von der Leyen, e vuri theksin te mbështetja për energji elektrike që Bashkimi Evropian ka ndarë për vendet e Ballkanit Perëndimor.
“Jemi këtu për ta thelluar integrimin ekonomik. Duke nisur me energjinë. Pakoja për Mbështetjen Energjike prej një milardësh për Ballkanin Perëndimor do të na ndihmojë ta formësojmë të ardhmen tonë të përbashkët në energji”, shkroi Von der Leyen në Twitter.
Kështu, si rrjedhojë e njohjes reciproke të letërnjoftimeve mes Kosovës dhe Bosnjes e Hercegovinës, qytetarët e Kosovës do të mund të udhëtojnë pa viza edhe në BeH, si vendi i vetëm që ishte në Ballkan ku ju mohohej lëvizja e lirë.
Ndryshe, Procesi i Berlinit ka nisur në vitin 2014 me iniciativën e kancelares së atëhershme gjermane, Angela Merkel. Ndër qëllimet kryesore të këtij procesi janë: përmirësimi i bashkëpunimit rajonal dhe integrimi evropian i rajonit të Ballkanit Perëndimor. Procesi fokusohet në lëvizjen e lirë të njerëzve, shërbimeve, mallrave dhe kapitalit./RFE/
