Samitit në Shkup, Edi Rama: BE dhe SHBA të prerë, kush pengon integrimin e tjetrit, pengon veten!

Pas Samitit të Bashkimit Europian në Shkup, Kryeministri Edi Rama tha se si BE si përfaqësues të SHBA e kanë bërë të qartë se kush bllokon procesin për një shtet tjetër, në fakt do të pengojë veten ndërsa u fol për hapa konkretë që do të lehtësojnë integrimin e rajonit në BE dhe mundësinë e integrimit në tregun e përbashkët rajonal.

“Atmosferë pozitive. U fol për punë konkretë. Për temat e sfidës së madhe që është përfitimi me sukses i gjithë rajonit nga plani i ri i rritjes së BE dhe mundësia e integrimit në tregun e përbashkët.
Është e qartë, iu bë e qartë dje dhe sot nga BE dhe SHBA se në këtë proces nuk ka asnjë hapësirë dhe asnjë dëshirë për të dëgjuar çështje të natyrës politike e bilaterale. Çdo vend që do bllokojë tjetrin në proces do bllokojë veten,” tha Edi Rama dhe ndonëse ishte shprehur se “Ballkani i Hapur” ka përfunduar misionin sot thotë se ishte i nevojshëm integrimi brenda rajonit, në mënyrë që Ballkani të jetë gati për integrimin në BE.

“U bë një komunikim pozitiv mes të gjithëve. Më rezulton që ky format dhe këto kërkesa që ka sot BE nga të gjithë ne për të na dhënë mundësinë të marrim shumë më tepër mbrapsht në aspektin ekonomik, flasin vetë për atë që më ka rënë goja gjithë këto vite. Që duhet të integrohemi brenda rajonit, që të jemi gati për në BE. BE e ka bërë shkak që nëse nuk jemi bashkë, ai që do bëhet pengesë do pengojë veten.”