Sanksioni i parë i BE, Edi Rama anulon mbledhjen e dy qeverive Kosovë-Shqipëri!
Kur Bashkimi Europian deshti të marrë masa ndaj Serbisë që vazhdon me politikën e jashtme ndaj Rusisë në kundërshtim me politikën e BE-së, kishte një ndërhyrje të jashtëzakonshme edhe publike nga Kryeministri i Shqipërisë, Edi Rama, në mbrojtje të Presidentit të Serbisë, Aleksandar Vuçiç!
Por kur kjo BE mendon ti vendos sanksione popullit të Kosovës për shkak të veprimeve të Qeverisë, që Brukseli vlerëson se kanë tensionuar situatën, telall i këtyre sanksioneve del Edi Rama dhe vendos i pari këto sanksione duke i komunikuar në një konferencë të jashtëzakonshme, sipas tij, pasi ka folur në orët e pasdites me shefin e diplomacisë europiane, Joseph Borrel, anulimin e mbledhjes së përbashkët mes dy qeverive Kosovë-Shqipëri që ishte parashikuar të mbahej nesër në Gjakovë.
“Ndjesë për këtë orë të pazakonshme, por është një komunikim i jashtëzakonshëm, i cili lidhet me takimin e nesërm të dy qeverive në Gjakovë.
E kam informuar kryeministrin Kurti se në kushtet e agravimit me orë të marrëdhënieve të Kosovës me krejt bashkësinë euro-atlantike, ky takim nuk mund të mbahet në formatin e parashikuar.
Pasi kam folur pasdite me shefin e diplomacisë europiane, Joseph Borrel, i kam kërkuar Albinit për t’u takuar nesër në Gjakovë në një format më të ngushtë, përkatësisht me ministrat e jashtëm dhe ata të mbrojtjes për të diskutuar pikërisht lidhur me këtë situate, e cila po e çan në mënyrë dramatike Kosovën me bashkësinë euro-atlantike në një pikë të paimagjinueshme, ku kjo e fundit ka vënë gishtin, faktikisht, në butonin që do vërë në lëvizje planin e sanksioneve ndaj shtetit që e ka krijuar vetë.
Për fat të keq dhe me shumë keqardhje më duhet të them që nuk kemi pasur dakordësi me kryeministrin Kurti për një ndryshim të formatit, ai ka kërkuar që mbledhja të bëhet normalisht dhe pastaj veç të diskutojmë edhe për këtë, por kjo nuk është e mundur sepse nuk është një moment për të krijuar një pasqyrë të rreme të asaj që në fakt ndodh në realitetin e Kosovës sot,” tha Edi Rama jo aq i vendosur për të ndihmuar Kosovën sa në rastin e Serbisë ku ishte dhe ngeli avokati i vetëm i Aleksandar Vuçiçit për mosvendosjen e sanksioneve Rusisë.
“Mbase nuk është një përgjigje përfundimtare nga ana e kryeministrit, unë shpresoj shumë që të mund të takohemi për të ballafaquar opinionet në kushtet kur, e përsëris, jemi në prag të vënies në lëvizje të planit, se nuk ma zë as goja të flas për sanksione, por të masave shtrënguese ndaj një shteti që është krijuar nga ata të cilët qartësisht janë në kushtet e sosjes së durimit.
Kam bërë një përpjekje për t’iu kërkuar edhe pak kohë, e kam marrë edhe pak kohë, por nëse nuk e shfrytëzojmë dot këtë kohë për një sens të përbashkët mes të gjithëve, atëherë kam shumë frikë se plani, që është një plan realisht shumë i rëndë për Kosovën, do të vihet në lëvizje.”
Gjithsesi, tashmë është e qartë se Serbia ka për avokat në BE, Kryeministrin e Shqipërisë, Edi Rama i cili mrbon veprimet e Vuçiçit me Rusinë, dhe po këtë kryeministër shqiptar Bashkimi Europian e përdor për telall për ti thënë Albin Kurtiti se bashkësia euroatlantike ka përgatitë sanksione ndaj Kosovës.
“S’më takon mua të bëj koment mbi këto. Nuk dua t’i mendoj, jam i tmerruar nga ideja që mund të ndodhin. Pasi nuk janë masa që kjo bashkësi merr ndaj vendeve jo dashamirëse ndaj saj. Kjo bashkësi po detyrohet t’i marrë ndaj një shteti që ka krijuar vetë. Edhe sikur këto masa të jenë të përkohshme, uroj të mos vihen, por mesa duket edhe përpjekjet e fundit po shkojnë drejt të njëjtit fat. Pra efekti destabilizues nuk do të jetë aq i përkohshëm dhe mbështetja nuk do të jetë më siç ka qenë deri tani,” tha Edi Rama duke mohuar të ketë lidhje anulimi i mbledhjes së dy qeverive pas reagimit të Albin Kurtit për Draftin e Statutit të Asociacionit që propozoi Kryeministri i Shqipërisë:
“Zero. Sepse së pari përpjekja ime për t’u takuar me kryeministrin e Kosovës nuk ka filluar sot. Zero sepse siç unë them atë që mendoj edhe Albini thotë atë që mendon dhe për mua nuk ka surpriza, sepse siç më njeh ai mua e njoh dhe unë atë. Ai beson vërtet se thotë diçka të rëndësishme dhe diçka që mund ta marr në konsideratë.
Ka dy njerëz që janë të painteresuar për Asociacionin dhe në këtë pikë janë bashkë, pra në kuptimin janë të interesuar që asociacioni të mos krijohet dhe ata janë kryeministër i Kosovës dhe presidenti i Serbisë sepse për mënyrën se si e kanë ndërtuar politikën e tyre të brendshme i duhet kjo situatë. Pse i çon presidenti ushtarët në kufi, mendon ju se mund të fute një ushtar serb një m në kufirin e Kosovës, as që nuk e imagjinon.
Por përse i çon? Për të ndezur shpirtin nacionalist të serbëve. Për çfarë këndojnë shtarët serb në kufi me Kosovës, Kosova është e jona. Këndojnë për ata që i dëgjojnë në Serbi. Për çfarë i duhet Kosovës një konfrontim me Serbinë. Serbia e ka humbur luftën njëherë e mirë. Aty është Amerika, është kjo që sot është në acarimin maksimal me qeverinë e Kosovës. Për çfarë duhet kjo histori konfrontimi? Duhet për politik të brendshme. Armik imagjinar në sy të zgjedhësve,” tha Kryeministri Edi Rama duke përfunduar:
“Ndaj unë jo vetëm që nuk prekem më vjen mirë dhe është pjesë e marrëdhënies së shëndetshme me Albin Kurtin sepse themi atë që mendojmë. Qëllimin e kemi një, njohja e plotë përfundimtare e Kosovës edhe nga Serbia dhe kërkimi I faljes që Serbia duhet t’i bëjë Kosovës për krimet që kanë bërë. Ndryshimi mes është se Albini i do këto në fillim dhe unë them që këto vijnë në fund.”
Ndryshe, anulimi i mbledhjes së dy qeverive vjen pak orë pasi Kryeinistri i Kosovës, Albin Kurti, reagoi ndaj Draftit të Statutit për Asociacionin e komunave me shumicë serbe i cili është hartuar nga Kryeministri Edi Rama
“S’kam dyshim që kryeministri Edi Rama, beson që propozimi i tij i draft-statutit është i mirë dhe duke qenë kështu atëherë krejt çka unë propozoj është që kryeministri Edi Rama, këtë draft-statut për pakicat kombëtare t’ia prezantojë presidentit të Serbisë, Aleksandar Vuçiç, më së largu në takimin e radhës për Ballkanin e Hapur për shqiptarët në Luginë.
Patjetër që ai beson se është model i duhur, e këtë do të duhej t’ia bënte si propozim presidentit të Serbisë për shqiptarët në Luginë, aq më tepër që neni 8 pika 1 e Kushtetutë së Shqipërisë thotë se mbron të drejtat kombëtare të popullit shqiptar kudo,” tha sot Kryeministri Albin Kurti për Draftin e Statutit për Ascociacionin e komunave me shumicë serbe të hartuar nga Kryeministri Edi Rama pa u konsultuar fare me Kryeministrin e Kosovës, Albin Kurti, ndërsa i është dërguar Presidentit të Francës, Emmanuel Macron, Kancelarit të Gjermanisë, Olaf Scholz, dhe Këshillit Evropian.
