Sarajevë, 64 persona të infektuar me leptospirozë, shpallet gjendja epidemike

Infeksioni me leptospirozë vazhdon të përhapet në zonën e Sarajevës, ku në fund të majit u shpall gjendja epidemike dhe deri dje u konfirmua se ishin sëmurë 64 persona.

Instituti i Shëndetit Publik në Sarajevë njoftoi se në 24 orët e fundit janë konfirmuar 24 raste të reja me leptospirozë, sëmundje kjo e transmetuar nga brejtësit.

Në Klinikën Infektive të Qendrës Klinike po trajtohen tre persona. Më së shumti raste, 51, u regjistruan në komunën e Novi Gradit.

Shumica e të infektuarve, përkatësisht 50 prej tyre, janë të moshës 30 deri në 65 vjeç. Tetë pacientë janë nga 20 deri në 29 vjeç, pesë janë më të vjetër se 66 vjeç, ndërsa një person nën moshën 19 vjeç është gjithashtu i infektuar.

Infeksioni me leptospirozë tek njerëzit ndodh kryesisht përmes kontaktit me jashtëqitjet e brejtësve, minjve që janë rritur në mënyrë të pakontrolluar, meqë nuk ka pasur deratizim sistematik në zonën e Sarajevës që nga viti 2021.

Infeksioni kryesisht manifestohet me rritje të temperaturës së trupit, dobësi të përgjithshme dhe dhimbje muskulore, por në disa raste mund të ketë edhe gjakderdhje dhe acarim të organeve të brendshme, të cilat mund të çojnë në vdekje.

Mësohet se shfaqja e leptospirozës erdhi si rezultat i anulimit të tenderëve publikë për procedurën e deratizimit pas ankimimit të ofertave të përzgjedhura, që tashmë është bërë një problem kronik i gjithë sistemit të prokurimit publik në Bosnje Hercegovinë.

Ndërkohë një infeksion i brucelozës u konfirmua në një fermë në komunën e Vogoshçës. Nga kjo sëmundje u sëmurën 13 lopë. Bruceloza nuk është fatale për njerëzit, por kur shfaqet te kafshët shtëpiake, ato zakonisht eutanizohen dhe trupat e pajetë digjen për të ndaluar përhapjen e infeksionit.