S’takohem me Vuçiçin, Presidentja e Kosovës e qartë: Serbia përgjegjëse për dhunën në veri!
Presidentja e Kosovës, Vjosa Osmani, tha në Samitin e dytë të Komunitetit Politik Evropian, EPC, që po zhvillohet në Chishinau të Moldavisë, se Serbia vazhdimisht ka shërbyer si satelit i Rusisë në rajonin e Ballkanit dhe ka tendenca për të destabilizuar Kosovën dhe vendet tjera të rajonit.
Më këtë rast ajo u shpreh qartë se Serbia dhe grupet e saj kriminale janë përgjegjëse për përshkallëzimin e dhunës në Kosovë dhe Serbia nuk e ka vendin në bashkësinë e popujve evropian.
“Ne si rajon dhe në veçanti si Kosovë, jemi përballë sfidave. Serbia vazhdimisht ka shërbyer si satelit i Rusisë në rajonin tonë, duke tentuar vazhdimisht për ta destabilizuar Kosovën, por edhe shtetet e tjera të rajonit. Unë jam këtu për të kërkuar përkrahjen e partnerëve tanë që t’i luftojmë këto tendenca destabilizuese,” tha Presidentja Osmani për media në Samitin e EPC duke shtuar se Presidenti i Serbisë, Aleksandar Vuçiç, është i interesuar të përdorë bandat e tij kriminale për të destabilizuar Kosovën, bandat të cilat janë dhe në listat e zeza të SHBA dhe po terrorizojnë edhe qytetarët në veri.
“Është me rëndësi që nga Serbia të kërkohet t’i ndalë veprimet destabilizuese dhe bandat kriminale. Këto janë grupe që janë në listën e zezë zë SHBA-së dhe të Britanisë. Ata po terrorizojnë qytetarët çdo ditë. Na duhet ndihma e aleatëve të jemi më të fokusuar në luftimin e grupeve, por urdhri ndaj tyre vjen nga Vuçiçi. Dihet kush i nxit ato, pra presioni duhet të jetë te Beogradi që ta ndalin dhunën. Kur ka dhunë, çdo zgjidhje mund edhe të fokusohet në implementimin e Marrëveshjes së Brukselit.”
Ndërkohë për të përditshmen serbe “Danas”, Vjosa Osmani u shpreh qartë se Serbia dhe grupet e saj kriminale janë përgjegjëse për përshkallëzimin e dhunës në Kosovë dhe Serbia nuk e ka vendin në këtë samit evropian, dhe as në bashkësinë e popujve evropian.
“Serbia nuk i takon bashkësisë evropiane,” tha Presidentja Osmani për të përditshmen serbe duke shtuar se pjesëtarët e strukturave kriminale serbe në veri të Kosovës janë fletëarreste ndërkombëtare dhe autoritetet serbe janë të afërto me këto grupe.
Në fund, Presidentja e Kosovës, Vjosa Osmani, bëri të ditur se do të zhvillojë takime me kancelarin e Gjermanisë, Olaf Scholz, Presidentin e Francës, Emmanuel Macron, si dhe me liderët e tjerë evropianë por jo dhe me Presidentin e Serbisë Aleksandar Vuçiç përderisa ai nuk zbaton marrëveshjet.
