Seanca për votimin e qeverisë më 3 Qershor

Kryesia e Parlamentit të Kosovës ka vendosur që nesër më 3 Qershor, në ora 11, të mbahet seanca ku pritet të votohet qeveria e re me kryeministër Avdullah Hoti, ashtu siç ka vendosur Hashim Thaçi.

“Ne jemi të sigurt që e kemi thirrur një seancë për nesër në ora 11 dhe në të cilën secili deputet mbi bazën e bindjes së vet do të votojë,” tha pas mbledhjes së Kryesisë së Parlamentit, shefi i grupit parlamentar të LDK-së, Arben Gashi.

Vendimi i kryesisë, raporton RFE vjen pasi Lidhja Demokratike e Kosovës, me tu publikuar aktgjykimi i Gjykatës Kushtetuese për dekretin e presidentit Hashim Thaçi, iu drejtua Parlamentit me kërkesë për seancë.

Ndryshe, pas fillimit të operacioneve antikrim dhe antikorrupsion nga qeveria e drejtuar nga Albin Kurti, dhe duke parë rrezikun me të kaluarën kriminale dhe të korruptuar që kanë, Hashim Thaçi, Isa Mustafa, Ramush Haradinaj dhe Fatmir Limaj u bënë bashkë për të rrëzuar Kurtin dhe për të krijuar koalicion të ri qeverisës.

Përkundër precedentit dhe vendimit të Gjykatës Kushtetuese për krijimin e koalicionit qeverisës nga partia fituese dhe faktit se në zgjedhjet e fundit parlamentare të 6 nëntorit të vitit të kaluar, LDK doli partia e dytë në zgjedhje, në rast të votimit të suksseshëm nesër në Parlament të qeverisë Hoti, atëherë, Kosova për herë të parë do të ketë një qeveri nga partia që nuk është fituese e zgjedhjeve.

Më 30 prill, ditën që presidenti i Hashim Thaçi mandatoi Avdullah Hotin për formimin e qeverisë së re, Lëvizja Vetëvendosje iu drejtua Gjykatës Kushtetuese duke kërkuar interpretimin e kushtetutshmërisë së dekretit të presidentit.

Vetëvendosje pretendonte se presidenti Thaçi kishte bërë shkelje kushtetuese kur kishte nxjerrë dekretin për mandatimin e Hotit për shkak se kjo e fundit nuk e kishte konsumuar të drejtën e saj për propozimin e mandatarit të ri, pas rrëzimit të qeverisë. Por, Gjykata Kushtetuese, e shpalli të ligjshëm dekretin e Thaçit.