Seanca plenare Anti-President, rrëzohen 8 dekretet e Ilir Metës. Edhe koncesionet…

Mazhoranca socialiste ka rrëzuar 8 dekretet e Presidentit të Republikës të kthyera për rishqyrtim në Parlament, ku përfshihen edhe dy ligjet për ndërtimin e dy akseve rrugore me PPP, Milot-Balldren dhe Orikum-Dukat, si dhe kandidatura e kryetarit të KLSH.

Para votimit, Kryetari i Parlamentit, shoku Gramoz sqaroi se dekreti për rishqyrtim e humbet fuqinë kur kundër tij votojnë shumica e anëtarëve të Parlamentit.

Përkundër paralajmërimeve të Kryetarit të Partisë Demokratike, Lulzim basha para procesit të votimit, me 74 vota kundër dhe vetëm 22 për, Parlamenti rrëzoi Dekretin “Për kthimin e ligjit nr. 51/2019 “Për miratimin e kontratës së koncesionit/PPP ndërmjet Ministrisë së Infrastrukturës dhe Energjisë, si autoriteti kontraktor, dhe “Gjikuria”, sh.p.k., si koncesionari, dhe shoqërisë koncesionare “Rruga Orikum – Llogara”, sh.p.k., për projektimin, ndërtimin dhe mirëmbajtjen e rrugës “Porti i jahteve – By-Pass Orikum – Dukat (ura e Shën Elizës)”. Në këtë demokracinë parlamentare të Edi Ramës ishin 4 deputetë që abstenuan.

Ndërsa Dekreti i Presidentit të Republikës nr. 11255, datë 08.08.2019, “Për kthimin e ligjit nr. 52/2019 “Për miratimin e kontratës së koncesionit/PPP ndërmjet Ministrisë së Infrastrukturës dhe Energjisë, si autoriteti kontraktor, shoqërisë “ANK”, sh.p.k., si koncesionari, dhe shoqërisë “Bardh konstruksion”, sh.p.k., si shoqëria koncesionare, për projektimin, ndërtimin dhe mirëmbajtjen e segmentit rrugor Milot – Balldren”” u rrëzua me 77 vota , 15 deputetë votuan për ndërsa 11 abstenuan.

Në fund, Parlamenti rrëzoi edhe kandidaturën e Petraq Milos,i cili u dekretua nga Presidenti për postin e kryetarit të Kontrollit të Lartë të Shtetit.

Pas rrëzimit nga mazhoranca të 8 Dekreteve të Presidentit, ka reaguar këshilltari i tij, Tedi Blushi, duke iu drejtuar Ministres së Shtetit për Marrëdhëniet me Parlamentin Elisa Spiropali, e cila foli ashpër nga foltorja e Parlamentit:

“E ftojmë të Çmendurën E. të lexojë raportin final të OSBE/ODIHR për dekretin kushtetues të Presidentit Meta dhe sjelljet antikushtetuese të Kuvendit, KQZ dhe Kolegjit Zgjedhor, që i provojnë të gjithë botës demokratike kapjen e shtetit nga Rilindja moniste.
Klithmat anti-presidenciale të porositura sot me urgjencë duan të spostojnë vëmendjen nga miratimi kokëfortë i PPP-ve më të shtrenjta në botë, në kundërshtim me Kushtetutën, ligjin dhe interesin publik, dhe në kurriz të qytetarëve shqiptarë.”

Ndryshe, para se të vulosej Seanca Plenare Anti-Presidenci, Spiropali u shpreh:

“Presidenti kthen në Kuvend çdo ligj. Sulmon nëpërmjet tastierës së tij dhe zëdhënësve qeverinë dhe parlamentin. Presidenca duhet ta dijë se kthimi i këtyre ligjeve është në kundërshtim me interesin publik. Rezervat materiale, janë vetëm të grupit A tek gruri dhe materialet e thjeshta, nuk e di pse Metës i shkon mendja menjëherë tek floriri, por këtë le ta shpjegojë Frojdi jo ne. Nevoja e ndryshimit të këtij ligji vjen nga eksperiencat e mëparshme. Gjatë kohës së emergjencave kemi pasur një vonesë të lëvrimit të mallrave!”