Seanca plenare, Basha: Ngushëllime zoti Xhaferi, por sot jeni në mortin e dytë

Kryetari i Partisë Demokratike, Lulzim Basha, para ratifikimin të Protokollit të Traktatit të Atlantikut Verior për aderimin e Republikës së Maqedonisë së Veriut, mori fjalën duke i shprehur fillimisht ngushëllime për 15 viktimat e aksidentit tragjik, kryetarit të Parlamentit të Maqedonisë së Veriut, Talat Xhaferi, duke shtuar se ai gjendet në mortin e dytë, atë të kapjes së Shqipërisë nga një qeveri që ka tradhtuar qytetarët e saj.

“Sot nuk është një situatë normale, për disa arsye. Akti i mbështetjes nga të gjitha partitë në Maqedoni të aderimit në NATO duhet të ishte një mesazh feste në Shqipëri. Por aksidenti tragjik i natës së mbrëmshme ka tronditur rëndë popullin shqiptar, popullin e Maqedonisë së Veriut ndaj dua t’u drejtoj familjarëve të viktimave, në emrin tim dhe të PD-së, ngushëllimet më të ndjera. Ngushëllime edhe ju, zoti Talat Xhaferi, që gjendeni sot këtu tek ne.

Por, sot, sipas liderit të opozitës, kryetari i Parlamentit të Maqedonisë së Veriut, është në mortin e dytë: “Sot, z. Xhaferi, ju gjendeni në mortin e dytë, atë të kapjes së Shqipërisë nga një qeveri që ka tradhtuar qytetarët e saj. Ndaj më lejoni ta drejtoj tani fjalën time tek qytetarët e shqipërisë, që do të mblidhen pasnesër në protestën e madhe kundër vjedhjes me ligj.”