Seanca plenare/ Sot votohen anëtarët e ri të Këshillit Drejtues të RTVSH

Sot seanca plenare eParlamentit të Shqipërisë është parashikuar me 6 Pika të rendit të ditës ndonëse arsyeja kryesore pse deputetët do të jenë në Parlament është Projektligji “Për ratifikimin e Protokollit të Traktatit të Atlantikut Verior për aderimin e Republikës së Maqedonisë së Veriut”, pas ratifikimit të që Parlamenti i Greqisë i bëri këtij Protokolli dhe bëri njohjen zyrtare të emrit “Maqedonia e Veriut”.

Ky Projektligj ka kaluar nëpër Komisionet përkatëse pa ndonjë problem dhe me konsensus kështu që sot nuk priten surpriza.

Ndërkohë Projektvendimi “Për zgjedhjen e tre anëtarëve të Këshillit Drejtues të Radiotelevizionit Shqiptar”,  i cili për shkak të debatit të përplasjeve politike që shkaktoi kryeministri Edi Rama me sjelljet e tij arrogante, nuk arriti të kaloj në seancën e kaluar plenare, sot vetëm sa do të konfirmohet si zakonisht, dakordësimi në mes të palëve politike për të përcaktuar organin më të rëndësishëm të televizionit publik shqiptarë, RTVSH, për ti shërbyer partive dhe jo qytetarëve.

Edhe pse ky vendim për realitetin shqiptar tashmë konsiderohet rutinë, kjo është dhe arsyeja pse RTVSH është degraduar deri në këtë pikë, ku Këshillin Drejtues e zgjedhin ata që nuk e shohin fare televizionin publik ndërkohë shtresa e mesme dhe ajo e ulët që nuk kanë mundësinë e abonimit në një platformë digjitale, vazhdojnë dhe akuzojnë këtë mënyrë makabre të përzgjedhjes. Sidoqoftë, kur çdo anomali në këtë vend pagëzohet nga mazhoranca me epitetin rilindas, pse nuk duhet edhe RTVSH të quhet “Televizioni që duam”.