Seancë dëgjimore me Grupin ECR, deputetët e PD: Burgosjet politike, për asgjësimin e opozitës!
Deputetët e Partisë Demokratike, Flamur Noka, Gazment Bardhi, Jorida Tabaku, Agron Gjekmarkaj dhe Albana Vokshi, në vijim të vizitës zyrtare të Grupit Parlamentar të PD në Parlamentin Europian ishin pjesë e një seance dëgjimore me eurodeputetët e Grupit Parlamentar të Konservatorëve dhe Reformatorëve Europian, ECR, ku i informuan me gjendjen e demokracisë në Shqipëri dhe sfidat madhore që duhet kapërcy në rrugën e integrimit në BE.
“Cënimi i zgjedhjeve të lira dhe të ndershme, përmes keqpërdorimit të burimeve shtetërore nga partia në pushtet, përdorimi i parave të korrupsionit, bashkëpunimi me krimin e organizuar deri në pikën e caktimit prej tij të kandidatëve për deputetë, tentativa për asgjësimin e opozitës përmes burgosjes politike të lidershipit, mosrespekimi i vendimeve të Gjykatës Kushtetuese,” ishin disa nga çështjet me të cilat u informuan eurodeputetët e ECR nga deputetët e Partisë Demokratike duke vlerësuar se këto i largojnë edhe më shumë Shqipërinë nga rruga europiane, bënë të ditur Grupi Parlamentar i PD përmes një njoftimi.
Deputetët e Grupit Parlamentar të PD dhe ata të Konservatorëve dhe Reformatorëve Europian, ECR, në Parlamentin Europian bashkëndanë në fund qëndrimin se është emergjente që Shqipëria të përqëndrohet në reformat kritike të nevojshme për anëtarësimin e Shqipërisë në BE.
Njoftim:
Gjatë vizitës në Parlamentin Europian patëm mundësinë për një seancë dëgjimore me përfaqësues të grupit parlamentar të “Konservatorëve dhe Reformatorëve Europian” (ECR). Ky takim ishte një mundësi e shkëlqyer për t’i informuar mbi të gjitha shqetësimet tona për gjendjen e demokracisë në vend, duke theksuar sfidat madhore që duhen kapërcyer në rrugën e integrimit në BE.
Shqipëria, si vend kandidat për në BE, e ka jetike të respektojë parimet themelore në qeverisje. Cënimi i zgjedhjeve të lira dhe të ndershme, përmes keqpërdorimit të burimeve shtetërore nga partia në pushtet, përdorimi i parave të korrupsionit, bashkëpunimi me krimin e organizuar deri në pikën e caktimit prej tij të kandidatëve për deputetë, tentativa për asgjësimin e opozitës përmes burgosjes politike të lidershipit, mosrespekimi i vendimeve të Gjykatës Kushtetuese, e largojnë edhe më shumë Shqipërinë nga rruga europiane.
Me miqtë europianë bashkëndamë qëndrimin se është emergjente që Shqipëria të përqëndrohet në reformat kritike të nevojshme për anëtarësimin e Shqipërisë në BE, duke përfshirë sigurimin e zgjedhjeve të lira dhe të ndershme, forcimin e institucioneve demokratike dhe sundimin e ligjit, dhe luftën ndaj korrupsionit dhe krimit të organizuar.
