Seancë e parlamentit të Edi Ramës pa përfaqësues të 200 mijë shqiptarëve, opozita protestë në orën 17:00
Sot seanca plenare e Parlamentit të Edi Ramës me fillim në orën 17:00 do të zhvillohet pa 19 deputetë të opozitës ose përfaqësues të rreth 200 mijë shqiptarëve që Kryeministri i Shkodrës, Himarës dhe gjithë Shqipërisë u mohoi të vazhdojnë jetën parlamentare pasi kundërshtuan politikëne tij antikombëtare, ndërsa opozita po në këtë orë ka paralajmëruar një protestë para Kuvendit.
Ndonëse seanca e sotme i dedikohet diskutimeve për problemet e qytetarëve dhe nuk ka ligje që pritet të miratohen, opozita ka paralajmëruar se foltorja sërish do jetë e bllokuar, skenar ky që nuk ka shqetësuar Edi Ramën dhe mazhorancë që tashmë janë mësuar të zhvillojnë seanca me vetëm pak minuta.
Ndërkohë para Kuvendit opozita ka paralajmëruar një protestë pas situatës së krijuar ku Edi Rama u ka mohuar shqiptarëve, tokën, ujin dhe ajrin, ndërsa ka filluar të jap me qira edhe bregdetin shqiptar, pas shqetësimeve që shtetit italian u kanë krijuar refugjatët afrikanë!
Pas kësaj proteste para Kuvendit, ajo pritet të zhvendoset në orën 18:00 në “Rrugën e Shpresës”, aty ku vazhdon dhe kundërshtohet vendimi i SPAK dhe GJKKO nga data 30 Dhjetor 2023, për masën e sigurisë “arrest shtëpie” për Kryetarin e Partisë Demokratike, Sali Berisha.
Ndryshe, në mbledhjen e fundit Këshilli Kombëtar është shprehur qart se sot do dalin në protestë te Parlamenti të cilin Edi Rama e ka bllokuar, sepse ai është Kuvendi i përfaqësuesve të popullit shqiptar, dhe jo të Lindës së radhës.
“Të hënën dhe çdo ditë, ne dalim te Rruga e Shpresës për t’i thënë JO burgosjeve politike, pavarësisht nëse ato janë për Sali Berishën, Fredi Belerin apo Arben Ahmetajn. Ne dalim kundër porosive dhe pritave që zbaton SPAK-u për hatër të Edi Ramës.
Të hënën ne mblidhemi për t’i thënë shqiptarëve dhe botës se, pse Amerika e dënon McGonigalin për tradhti dhe korrupsion, por SPAK, kantautorin, bashkëautorin dhe bashkëfajtorin e agjentit të FBI, e lejon të dalë e të shesë dokrra, si luftëtar i anti-korrupsionit?!
Të hënën ne dalim për t’u thënë, për të njëmijtën herë, shqiptarëve dhe botës se, Edi Rama dhe Erion Veliaj janë pronarë faktikë të inceneratorëve dhe, se duhen hetuar si të tillë,” është shprehur Sekretari i Përgjithëm i Partisë Demokratike, Flamur Noka në fjalën e tij duke përfunduar:
“Ne dalim për të mos lejuar që pushteti i Ramës të nxjerrë jashtë ligjit forcën e parë të pluralizmit, Partinë Demokratike. Për të mos lejuar që Rama i etërve të burgosë dhe dënojë, me këlyshët e rilindur të Sigurimit, liderin historik, jo vetëm të forcës sonë, por të pluralizmit shqiptar.”
