Seancë plenare/ Edi Rama në Kievë, “Paketa Antishpifje” sot nuk diskutohet
Përkundër paralajmrimit të Kryeministrit Edi Rama se pas kthimit të “Paketës Antishpifje” nga Presidenti i Republikës, Ilir Meta, ajo do të kaloj në seancë plenare pas vitit të ri, ajo sot nuk është futur në Rendin e Ditës ku janë parashikuar 6 Pika.
1. Hapja e Sesionit te VI-te te Legjislatures se IX -te te Kuvendit te Shqiperise
2. Miratimi i procesverbalit te seances plenare te dates 18.12.2019 (neni 44, pika 2 e Rregullores)
3. Njoftimi i projektligjeve te depozituara ne Kuvend (neni 44, pika 3 e Rregullores)
4. Miratimi i Programit 6 javor te Punes se Kuvendit per periudhen 20 janar – 7 mars 2020 (neni 26, pikat 5, 6 te Rregullores, votim me shumice te thjeshte)
5. Miratimi i Kalendarit 3-javor te punimeve te Kuvendit per periudhen 20 janar – 7 shkurt 2020 (neni 27, pikat 3, 4 te Rregullores, votim me shumice te thjeshte)
6. Paraqitja ne Kuvend e kalendarit te raporteve vjetore te organeve kushtetuese dhe atyre te krijuara me ligj per veprimtarine e vitit 2019 (neni I 03, pika I e Rregullores) .
Nuk dihen arsyet pse “Paketa Antishpifje” nuk është përfshirë sot në Rendin e Ditës por nga postimi i Kryeministrit Edi Rama në rrjetin social Facebook mund të kutpohet se sot prioritet i Shqipërisë është Ukraina!
“Kiev, Ukrainë: Ditë takimesh me autoritetet e larta të vendit në cilësinë e Kryetarit në Detyrë të OSBE – Në Ministrinë e Punëve të Jashtme, me ministrin Vadym Prystaiko,” thekson Edi Rama përmes rrjetit social Facebook shoqëruar dhe me video.
Nuk dihet nëse Kryetari i Grupit Parlamentar të PS, Taulant Balla, është i informuar për Rendin e Ditës i cili është publikuar me vendim të Kryetarit të Parlamentit, Gramoz Ruçi, por Balla pas Konferencës së Kryetarëve tha se sot në seancën plenare do të diskutohen shumë çështje e reforma të rëndësishme.
“Konferenca e kryetarëve diskutoi për dy komisione të posaçme. Një prej komisioneve bie ndesh me rregulloren e Kuvendit. Komisionet e posaçme janë kërkuar nga opozita. Gjatë këtij sesioni parlamentar Kuvendi i Shqipërisë, sikurse diskutuam edhe gjatë konferencës së kryetarëve do të përmirësojë në shumë çështje, legjislacionin shqiptar për sa i përket ndërtimit për të garantuar sa më shumë siguri dhe sa më shumë kontroll të vijueshëm të garancisë së ndërtimit për t’i dalë përpara çdo lloj problematike sikurse mund të jenë evidentuar pas tërmetit të 26 nëntorit. Lidhur me një kërkesë tjetër, ajo është një kërkesë që miratohet automatikisht për shkak se është parashikuar në ligj. Është shumë e nevojshme që kuvendi të ushtrojë në mënyrë të vijueshme një monitorim për zbatimin e ligjit për shpërblimin e ish-të përndjekurve politikë për mënyrën e marrjes së dëmshpërblimit dhe mënyrën e zbatimit të ligjit kuadër për këtë çështje,” tha Taulant Balla duke përfunduar:
“Seanca sot pasdite në orën 17:00 për të diskutuar shumë çështje e reforma të rëndësishme.”
