Seancë plenare, sot ndahet Hekurudha Shqiptare

Seanca e sotme plenare me 16 Pika të Rendit të Ditës, ku pjesën më të madhe do ti marrin raportimet e AKEP, ERRU dhe ERRE shënon dhe ditën e zezë të Hekurudhave Shqiptare ndonëse ndarja e saj miratohet nga një përbërje parlamentare që nuk ka mandat.

Kështu, Projektligji “Për krijimin e Autoritetit të Sigurisë Hekurudhore”, Projektligji “Për krijimin e Autoritetit Rregullator Hekurudhor”, Projektligji “Për ndarjen e shoqërisë “Hekurudha shqiptare” sh.a.” dhe Projektligji “Për krijimin, organizimin dhe funksionimin e Autoritetit Kombëtar të Investigimit të aksidenteve dhe incidenteve hekurudhore dhe detare”, si Pika 9, 10, 11, 12 të Rendit të Ditës pritet të miratohen sot duke i dhënë përfundimisht dorën e fundit ndarjes së kësaj Shoqate Aksionare e cila nuk i rezistoi kohës por mosinteresimit për një kompani të rrënuar ku duhen investime të mëdha për rivitalizim.