Sekretari i Përgjithshëm i NATO-s sot në Kosovë, takim me Presidenten Osmani dhe Kryeministrin Kurti
Sekretari i Përgjithshëm i NATO-s, Mark Rutte, sot do të vizitojë Kosovën, së bashku me ambasadorët e Këshillit të Atlantikut të Veriut ku pritet të takoj Presidenten Vjosa Osmani dhe Kryeministrin Albin Kurti.
Pas takimit, Presidentja Osmani dhe Sekretari i Përgjithshëm Rutte do të mbajnë një konferencë për media.
Pas këtyre takimeve ai pritet të takojë dhe përfaqësuesit e trupave ndërkombëtare në Kosovë.
Kjo vizitë e Sekretarit të Përgjithshëm të NATO-s, vjen në kulmin e luftës propagandistike që po zhvillohet kundër Qeverisë Kurti dhe në prag të krijimit të qeverisë së re me kërcënimet e buzhalëve dhe batonëve për tërheqjen e trupave amerikane, ku Mark Rutte pritet të riafirmoj përkushtimin e NATO-s ndaj sigurisë në Kosovë dhe stabilitetit në rajon.
Ndërsa Policia e Kosovës ka njoftuar qytetarët për masat e sigurisë gjatë kohës sa Sekretari i Përgjithshëm i NATO-s, Mark Rutte, do të qëndroj në Kosovë.
“Policia e Kosovës, gjatë kësaj vizite, do të kujdeset për ruajtjen e rendit dhe qetësisë publike gjatë kohës së lëvizjes së eskortës dhe kohës së qëndrimit të delegacionit në Republikën e Kosovës,” thekson Policia e Kosovës duke saktësuar se për të mundësuar qarkullim të lirë të eskortës sipas agjendës së vizitës, Policia do të bëjë ndërprerje të përkohshme të qarkullimit të trafikut, në intervale të shkurtra kohore të disa segmenteve rrugore ku edhe pritet të kalojë eskorta.
Gjithashtu, riorientim të trafikut do të ketë në afërsi të objekteve shtetërore, dhe për këtë arsye Policia e Kosovës kërkon mirëkuptim të qytetarëve dhe pjesëmarrësve në trafik.
Ndryshe, kjo është vizita e parë e Sekretarit të Përgjithshëm Mark Rutte në Kosovë që kur mori drejtimin e NATO-s në tetor të vitit të kaluar.
Ndërkohë dje Mark Rutte qëndroi për vizitë në Sarajevë. Vizita e Ruttes vjen në një kohë të ndjeshme për rajonin, vetëm disa ditë pasi ai deklaroi se stabiliteti në Kosovë, Bosnje Hercegovinë dhe Serbi është në interesin e NATO-s dhe aleatëve të saj.
Aktualisht, 4.686 trupa nga 29 vende të botës shërbejnë në Kosovë, në kuadër të misionit paqeruajtës të NATO-s, KFOR. Më numrin e forcave kryeson Italia me 1.258 ushtarë, nga Shtetet e Bashkuara janë 608 ushtarë ndërsa nga Shqipëria 90 ushtarë. Ky numër i trupave të NATO-s përfshinë dhe praninë e shtuar në Kosovë gjatë vitit 2023, me rritjen e tensioneve në veri.
