Sekretari i Përgjithshëm i NATO-s: Ushtarët koreanoverior kanë mbërritur në Kursk

Sekretari i Përgjithshëm i NATO-s, Mark Rutte, konfirmoi sot se forcat ushtarake koreanoveriore që janë dërguar në Rusi, janë vendosur në rajonin e Kurskut.

“Thellimi i bashkëpunimit ushtarak në mes të Rusisë dhe Koresë së Veriut është kërcënim edhe për sigurinë indo-paqësore dhe euroatlantike,” tha Rutte pasi përfaqësia koreanoveriore ka informuar zyrtarët dhe diplomatët e NATO-s.

Forcat ukrainase kanë kryer një ndërhyrje të madhe në Kursk në muajin gusht dhe kanë mbetur në rajon, por kohët e fundit Rusia po kthen ngadal territoret e humbura dhe cenon ushtrinë ukrainase.

“Përshkallëzim i rëndësishëm”

Rutte tha se dilsokimi koreanoverior paraqet një “përshkallëzim të rëndësishëm” të përfshirjes së Pyongyangut në “luftën ilegale ruse” në Ukrainë, shkeljes së Rezolutës së Këshillit të Sigurimit të OKB dhe “zgjerim i rrezikshëm” i luftës.

Dislokimi i forcave koreanoveriore, tha ai, është shenjë e “dëshpërimit gjithnjë e më të madh” të presidentit rus Vladimir Putin. 

“Më shumë se 600.000 ushtarë rus janë vrarë ose plagosur në luftën e Putinit dhe ai nuk është në gjendje ta mbajë sulmin e tij ndaj Ukrainës pa mbështetjen e jashtme,” tha Rutte.

Ndryshe, Kremlini hodhi poshtë raportet mbi dislokimin e ushtarëve koreanoveriorë si “lajme të rreme”. Por Putin nuk e mohoi faktin se forcat koreaniveriore janë aktualisht në Rusi dhe shtoi se është çështje e Moskës se si do të zbatohet marrëveshja e partneritetit me Pyongyangun.

Përfaqësuesi i Koresë së Veriut në Kombet e Bashkuara në New York i ka cilësuar raportet “thashetheme të pabazuara”.