Sekretariati i Etikës së Edi Ramës ndëshkon 6 deputetë të PD me 30 ditë
Pas shqyrtimit të kërkesës së Partisë Socialiste për përjashtimin e deputetëve të opozitës pas incidenteve gjatë dhe në nisje të seancës plenare të 18 dhjetorit 2025, Sekretariati i Etikës së Edi Ram vendosi të marrë masa për 6 nga 29 deputetët e denoncuar, ndaj të cilëve ishte kërkuar përjashtim me 30 dhe 60 ditë.
Kryetari i Sekretariatit të Etikës, Ulsi Manja, njoftoi se është vendosur përjashtimi me 30 ditë pune nga seancat plenare dhe komisionet parlamentare për sjellje joetike të 6 deputetëve: Belind Këlliçi, Fidel Kreka, Albana Vokshi, Klevis Balliu, Flamur Noka dhe Elda Hoti.
Ndërkohë, për 23 deputetë të tjerë, nuk u vendos përjashtim nga seancat plenare, por tërheqje vëmendje për sjelljen e tyre në Parlament.
Mbledhja e Sekretariatit të Etikës ku u shqyrtua kërkesa e mazhorancës për përjashtimin e 29 deputetëve të PD-së, ka zgjatur shumë pak minuta.
Pas debateve, socialistët janë larguar nga salla, për t’u tërhequr për të marrë vendimin. Shkak i mbylljes herët të mbledhjes është bërë lidhja live që PD ka bërë në rrjetin social “Facebook”, pasi mbledhja sipas PS-së duhet të ishte pa praninë e mediave.
Sipas Ulsi Manjës, opozita kishte shkelur nenin 8 të rregullores. Kaq ka mjaftuar që opozita të reagojë me akuza, ndërsa deputetët e PD-së ironizuan me faktin që socialistët duhet të shkonin te ‘zyra’ e Ergys Agasit, madje të pinin dhe verë.
DEBATI
Noka: Shkoni te zyra e Gysit, atje bëni mbledhjen. Shkoni atje! Po ju pret Gysi, që të merrni vendimet atje. Do i merrni vendimet me Gysin!
Vokshi: Pini dhe verën e Gysit.
Noka: Atje shkoni!
Balliu: Atje do të shkoni që të merrni vendimin në parim?!
Vokshi: Ja ku janë provat tona!
Balliu: Deputeti i Troplinit, Balla ka ardhur që të pezullojë opozitën
Noka: Në 35 vite po përjashtohen opozitarët me pozicione partiake.
Ndryshe, sipas kërkesës së PS, seanca plenare e 18 dhjetorit u shoqërua me akte dhune, përfshirë hedhjen e lëndëve piroteknike dhe sendeve të forta në sallë, sulme ndaj Kryetarit të Kuvendit, anëtarëve të Këshillit të Ministrave dhe punonjësve të Gardës së Republikës, si dhe bllokimin e foltores dhe zhvillimit normal të punimeve parlamentare.
Grupi Parlamentar i PS thekson se, bazuar në pamjet filmike dhe provat e administruara, këto veprime përbëjnë shkelje të rënda të Rregullores së Parlamentit dhe Kodit të Sjelljes së Deputetit.
