Sekuestrimi i 400 kg kokainë, Ambasadorja e SHBA: Rezultati i bashkëpunimit SHBA…
Finalizimin e operacionit ndërkombëtar me kapjen e 400 kg kilogramëve kokainë në Lipjan të Kosovë, Ambasadorja e SHBA në Tiranë, Yuri Kim, e konsideron rezultat të bashkëpunimit të fortë midis SHBA, Italisë, Shqipërisë dhe Kosovës ndërkohë Ambasada e SHBA në Prishtinë e cilëson si një fitore të madhe për sundimin e ligjit.
“Kapja e djeshme e 400 kg kokainë është rezultat i bashkëpunimit të fortë midis SHBA, Italisë, Shqipërisë, Kosovës,” thekson Ambasadorja amerikane Yuri Kim përes rrjetit social Twitter duke përfunduar:
“SPAK & Policia e Shtetit Shqiptar, DEA, luajtën një rol të rëndësishëm në këtë sulm kundër trafikantëve ndërkombëtarë të drogës dhe krimit të organizuar.”
Ndërkohë Ambasada e SHBA në Prishtinë në reagimin e saj e konsideron sukses përmes partneriteteve globale.
“Luftimi i krimit të organizuar dhe trafikut të drogës kërkon vendosmëri dhe bashkëpunim ndërkombëtar. Ju lumtë autoriteteve të Kosovës për konfiskimin e djeshëm të drogës në Lipjan – suksesi përmes partneriteteve globale midis Kosovës, Italisë, Shqipërisë, & DEA-s,” thekson Ambasada amerikane në Prishtinë në reagimin e saj përmes rrjetit social Twitter duke pwrfunduar:
“Fitore e madhe për sundimin e ligjit!”
Ndryshe, pas sinjalizimit nga DEA, 400 kg kokainë nga porti i Santosit në Brazil me destinacion Kosovën, u sekuestrua në Lipjan pas një aksioni të suksesshëm të DEA-s amerikane, autoriteteve italiane, shqiptare dhe atyre të Kosovës, ku dhe u ndaluan 25 persona ndërsa u vunë në pranga 7 prej tyresi të dyshuar në përfshirjen e trafikimit të kësaj sasie kokaine e cila rezultoi se po transportohej me kamion të kompanisë shqiptare, “MC Foods” ku aksionar janë dy biznesmen, Izet Sheqiri nga Kosova dhe Bledar Habili nga Shqipëria.
Sot Prokuroria Speciale e Kosovës, PSRK, ka bërë kërkesë në Gjykatën Themelore në Prishtinë, për caktimin e paraburgimit të 7 personave, të cilët janë ndaluar dje pas sekuestrimit të 400 kg kokainë. Kërkesën, Prokuroria Speciale e ka bërë për shkak të dyshimit se të njëjtit kanë kryer veprat penale “Pjesëmarrja dhe organizimi i grupit kriminal të organizuar” nga neni 277 paragrafi 1 të KPRK-së, lidhur me veprën penale “Posedimi i paautorizuar i narkotikëve, substancave psikotrope ose analoge” nga neni 269 paragrafi 1 lidhur me nenin 275 paragrafi 1 pika 1.1 dhe 1.9 të KPRK-së dhe në drejtim të veprës penale “Mbajta ne pronësi, kontroll ose posedim të paautorizuar të armëve” nga neni 366 paragrafi 1 i KPRK-së.
