Sekuestrimi i inceneratorit të Tiranës nga SPAK, emërohet Administratori i shtetit

Pas sekuestrimit të inceneratorit të Tiranës, impianti i mbetjeve menaxhohet nga Administratori i shtetit, Arjan Baçi, i cili sot duke bërë të ditur se bashkitë e Qarkut Tiranë janë debitore, paralajmëron se moszbatimi i kontratës prej tyre mund të shkaktohet një kaos.

“Gjykata ka vendosur që për menaxhimin e kësaj shoqërie të merret shoqëria e administrimit të pasurive të sekuestruara dhe administrator jam zgjedhur unë nën varësin e ministrisë së Brendshme. Puna po vazhdon normalisht, po ndiqen të gjitha kontratat dhe po shihen prapambetjet që të bëhet trajtimi i mbetjeve urbane të Tiranës,” tha Arjan Baçi duke paralajmëruar:

“Një nga problematikat është parë që bashkitë e Qarkut Tiranë janë debitorë në këtë kompani dhe jemi duke dërguar shkresa për ti vënë para përgjegjësisë, pasi moszbatimi i tyre do të sillte një kaos për mbetjet”, u shpreh ai.

Ndryshe, pas sekuestrimit të pronave dhe inceneratorit të Klodian Zotos dhe Mirel Mërtirit, impianti i mbetjeve të Tiranës tashmë administrohet nga Agjencia e Administrimit të Pasurive të Sekuestruara dhe Konfiskuara, në Ministrinë e Brendshme.