Sekuestrohen 500 kg drogë në Karaburun, ja dyshimet e policisë

Një sasi prej 500 kilogramësh drogë është gjetur sot në një magazinë pranë Karaburunit në Vlorë.

Policia dyshon se droga mund të ketë lidhje me gomonen 12 metra të gjatë e cila u pikas mbrëmjen e së martës dhe u ndoq nga policia për mbi tre orë. Trafikantët kanë mundur të largohen dhe t’i shpëtojnë prangave.

Gomonen skafistët e lanë në Darëzezë të Fierit dhe policia dyshon se një manovër e tillë është kryer për të humbur gjurmët e drogës që trafikantët kërkonin të ngarkonin në gomone.

Por gjetja e 500 kilogramëve këtë të mërkurë në gjirin e Bristanit, ka shtuar dyshimet e policisë se dy ngjarjet kanë lidhje me njëra tjetrën.